„ქრისტიან-დემოკრატებმა" ფართო მასშტაბიანი საარჩევნო კამპანიის წარმოება უკვე დაიწყეს. დღეს 14.00 საათზე „ქრისტიან-დემოკრატიული მოძრაობის" ლიდერები აჭარის მოსახლეობას ბათუმში სპორტის სასახლე „ბასკოში" შეხვდებიან. იგეგმება რამოდენიმე გამოსვლა. შეხვედრას გახსნის ნიაზ ზოსიძე „ქრისტიან-დემოკრატების" აჭარის ორგანიზაციის თავმჯდომარე. შემდეგ მოძრაობის ლიდერები გიორგი თარგამაძე, ინგა გრიგოლია, გიორგი ახვლედიანი და მაგდა ანიკაშვილი მოსახლეობას სიტყვით მიმართავენ და საარჩევნო პრიორიტეტებს გააცნობენ.
გიორგი თარგამაძის განცხადებით, „ქრისტიან-დემოკრატების" გამარჯვების შემთხვევაში ბავშვები უზრუნველყოფილნი იქნებიან ხარისხიანი და ხელმისაწვდომი განათლებით, მშობლები დასაქმებულები იქნებიან, ხოლო პენსიონერები დაფასებულები.
შეგახსენებთ რომ „ქრისტიან-დემოკრატებმა" საარჩევნო კამპანია ქუთაისში 13 ივლისს მრავალათასიანი ფორუმით ოფიციალურად გახსნეს.
