ყვარლის რაიონის სოფელ ახალსოფელში საფლავები გაძარცვეს. როგორც ადგილობრივებმა კახეთის საინფორმაციო ცენტრს აცნობეს, დაუდგენელი პირები საფლავზე შემოსაზღვრულ ფერად ლითონებს ჭრიან და ჯართში აბარებენ.
ახალსოფლის მაცხოვრებლების თქმით, სასაფლაოებიდან ალუმინის ღობეების მოპარვის უკვე რამდენიმე შემთხვევას ჰქონდა ადგილი. ერთ-ერთი სასაფლაოს გაძარცვის დროს ქვაზე დახატულ პორტრეტს თვალები ამოჩიჩქნეს.
მოსახლეობამ რეაგირებისათვის ყვარლის პოლიციას მიმართა. „გამოძიება დაიწყო. საქმეს ყვარლის პოლიცია იძიებს", - განუცხადა კახეთის საინფორმაციო ცენტრს ახალსოფლის ტერიტორიული ორგანოს რწმუნებულმა სიმონ ტივიშვილმა.
სამართალდამცავებმა საქმე ამ დრომდე ვერ გახსნეს.
