მიხეილ სააკაშვილი ცაიშში იმყოფებოდა. პრეზიდენტმა ის ქალბატონი მოინახულა, რომელსაც გუშინ მასთან შეხვედრა სურდა. მიხელ სააკაშვილმა როზა წყაბელიასგან პრობლემები მოსმინა და დახმარებას დაჰპირდა.
"მე ყოველთვის ვიყავი, ვარ და ვიქნები საქართველოში გაჭირვებულების დამცველი. თქვენს თანასოფლელებს, რომლებმაც შეურაცხყოფა მოგაყენეს, უკვე დიდი ხანია პასუხი ვაგებინე. ეს იქნება გაკვეთილი ყველასთვის, ვინც ჩადგება ჩემსა და იმ ადამიანს შორის, ვისაც უჭირს, რაღაცის თქმა უნდა თავის მიერ არჩეულ პრეზიდენტთან", _ განაცხადა სააკაშვილმა.
შეგახსენებთ, რომ დღეს შსს ზუგდიდის სამხარეო მთავარი სამმართველოს თანამშრომლებმა დააკავეს სოფელ ცაიშში მცხოვრები ბაკურ მალიშავა და გია გუგუჩია. დაკავებულთა მხრიდან ადგილი ჰქონდა მოქალაქე როზა წყაბელიას მიმართ შეურაცხმყოფელ ქმედებას. დაკავებულებმა მოსახლეობის შეკრების ადგილიდან წყაბელია ფიზიკური ძალის გამოყენებით გაიყვანეს. ზემოაღნიშნულიდან გამომდინარე, მალიშავა და გუგუჩია დაკავებული იქნენ პოლიციის მიერ და სასამართლომ მათ შეუფარდა ადმინისტრაციული პატიმრობა 15 დღის ვადით.
შსს-მ მიიღო გადაწყვეტილება და სამსახურიდან გაათავისუფლა ზუგდიდის სამხარეო მთავარი სამმართველოს საუბნო განყოფილების უფროსი გელა ნარუშვილი, რომელიც შეესწრო აღნიშნულ ფაქტს, არ გაითვალისწინა კანონით მასზე დაკისრებული მოვალეობა და არ აღკვეთა ზემოაღნიშნული ფაქტი.
