2011 წელს რუსმა სამართალდამცავებმა სულ 37 ე.წ. კანონიერი ქურდი დააკავეს. მათგან 26 გასამართლებულია. განცხადება ამის შესახებ რუსეთის შს მინისტრმა ვლადიმერ კოლოკოლცევმა გააკეთა. მისი ინფორმაციით, დაკავებული ე.წ. კანონიერი ქურდების გარდა, სამართალდამცავებმა ასევე დამნაშავეობრივი ფორმირებების 98 ლიდერი დააკავეს.
რუსული მედია აღნიშნავს, რომ პრაქტიკულად ყველა დაკავებულის ჯიბეში, რომელსაც უმაღლესი ე.წ. ქურდული ტიტული აქვს, ერთსა და იმავე ნივთიერებას პოულობენ.
2011 წლის ზაფხულში, მოსკოვში ნარკოტიკებით ქართველი ე.წ. კანონიერი ქურდი რამაზი დააკავეს, თებერვალში კი ე.წ. კანონიერი ქურდი რომა კაშაევი დაიჭირეს. ამის შემდეგ მალევე კუნცევოს სასამართლომ ქართველ ე.წ. კანონიერი ქურდს მალხაზ აფციაურს 5 წელი მიუსაჯა. მარტში მოსკოვის ერთ-ერთ რესტორანში თბილისელი ოთარ ტოტოჩია, ზედმეტსახელად ბატია და ბაქოელი ალიბალა გამიდოვი, ზედმეტსახელად გოჯა დააკავეს. ამ ნუსხაშია ასევე ბადრი კოღუაშვილი, ზედმეტსახელად ბადრი ქუთაისსკი - იგი ერთ-ერთი ყველაზე ავტორიტეტული ე.წ კანონიერი ქურდია. 47 წლის ბადრი ამბერკის ძე მაისში კაფე "გლამურ-სახინკლეში" დააკავეს. იგი იქ სხვა ასევე ე.წ. კანონიერი ქურდს ალექსეი სუვოროვს, ზედმეტსახელად პეტრიკსა და ტარიელ ონიანთან დაახლოებულ ადამიანს, გელა ცერცვაძეს ხვდებოდა. ბადრის 2,81 გრამი ჰეროინი აღმოუჩინეს.