პოლიტიკური კოალიცია "ქართული ოცნება" განცხადებას ავრცელებს. განცხადებაში აღნიშნულია, რომ "ქართული ოცნების" მიერ 1-ელ ივლისს ქ. მცხეთაში დაგეგმილი მასობრივი მშვიდობიანი ღონისძიების ჩატარების დროს სათანადო განმასხვავებელი ნიშნებით აღჭურვილი პოლიციის თანამშრომლებმა აქციის ორგანიზატორებთან თანამშრომლობით უნდა უზრუნველყონ საზოგადოებრივი წესრიგის დაცვა, მოქალაქეების უსაფრთხოება, ტრანსპორტის მოძრაობისა და პარკირების ადეკვატური რეგულირება.
მოგეხსენებათ, შეკრებისა და მანიფესტაციის ორგანიზატორების მიერ ღონისძიების ადგილის და დროის შესახებ გაფრთხილების შეტანა ადგილობრივ და სახელმწიფო ორგანოებს ავალდებულებს, მიიღონ განსაკუთრებული ზომები მოქალაქეთა უსაფრთხოების და საზოგადოებრივი წესრიგის უზრუნველსაყოფად. ნაცვლად ამისა, კოალიცია "ქართული ოცნების" მიერ დღემდე ორგანიზებული მასობრივი აქციების (თბილისში, ქუთაისში, ოზურგეთში) დროს არც ღონისძიებისთვის გამოყოფილ ადგილებში და არც მიმდებარე ტერიტორიაზე სამსახურებრივ ფორმაში გამოწყობილი პოლიციელები საერთოდ არ გამოჩენილან. შესაბამისად, საზოგადოებრივი წესრიგის დაცვაზე პასუხისმგებელი ორგანოები არათუ არ იღებენ დამატებით ზომებს ათეულობით ათასი მოქალაქის შეკრებისა და მსვლელობის დროს მათი უსაფრთხოების უზრუნველსაყოფად, არამედ უარს ამბობენ "პოლიციის შესახებ" კანონით მათზე დაკისრებული ყოველდღიური ფუნქციების შესრულებაზეც კი.
პოლიციის ორგანოების ამგვარი დამოკიდებულება კიდევ უფრო აღრმავებს ისედაც უკიდურესად გამწვავებულ პრობლემას - სახელმწიფო ხელისუფლებით აღჭურვილი პირების მიერ ორმაგი სტანდარტების გამოყენებას მმართველი პარტიის პოლიტიკური მომხრეებისა და მოწინააღმდეგეების მიმართ. აღნიშნული პრობლემა მძიმდება იმითაც, რომ ფორმიანი პოლიციელების მიერ ოპოზიციის მიერ ორგანიზებული შეხვედრების ადგილების მიტოვების პარალელურად აქტიურობენ სხვადასხვა ძალოვანი უწყების სამოქალაქო ფორმაში ჩაცმული პირები (მაგალითად, ორიოდე დღის წინ სოფელ მერეთში მომხდარი ინციდენტი).
უწყებათაშორისი კომისია შეიქმნა სწორედ თავისუფალი და სამართლიანი საარჩევნო გარემოს უზრუნველსაყოფად დარღვევების პრევენციისა და ეფექტური აღმოფხვრისთვის. ამიტომ მოგმართავთ, მიიღოთ სათანადო ზომები, რათა სამართალდამცავმა ორგანოებმა განუხრელად შეასრულონ კანონით მათზე დაკისრებული ფუნქციები. კერძოდ, ველით, რომ კოალიცია "ქართული ოცნების" მიერ 1-ელ ივლისს ქ. მცხეთაში დაგეგმილი მასობრივი მშვიდობიანი ღონისძიების ჩატარების დროს სათანადო განმასხვავებელი ნიშნებით აღჭურვილი პოლიციის თანამშრომლები აქციის ორგანიზატორებთან თანამშრომლობით უზრუნველყოფენ საზოგადოებრივი წესრიგის დაცვას, მოქალაქეების უსაფრთხოებას, ტრანსპორტის მოძრაობის და პარკირების ადეკვატურ რეგულირებას. სათანადო განაცხადით მივმართეთ ქ. მცხეთის მუნიციპალიტეტსაც.
