I კვარტალში საგადასახდელო ბალანსის მიმდინარე ანგარიშის დეფიციტმა 384.3 მლნ აშშ დოლარი(638.1 მლნ ლარი) შეადგინა, რაც წინა კვარტალთან შედარებით 27.7 პროცენტით ნაკლებია, ხოლო გასული წლის ანალოგიურ პერიოდთან შედარებით 25.9 პროცენტით მეტია.
წინა კვარტალთან შედარებით, საქონლის ექსპორტი 146.6 მლნ აშშ დოლარით, ხოლო იმპორტი 333.6 მლნ აშშ დოლარით შემცირდა, რის შედეგადაც საქონლით ვაჭრობის ბალანსის დეფიციტი შემცირდა, და 841.7 მლნ აშშ დოლარი (1.4 მლრდ ლარი) შეადგინა, რაც 18.2 პროცენტით ნაკლებია წინა კვარტალთან და 22.7 პროცენტით მეტი 2011 წლის I კვარტალთან შედარებით.
მომსახურების ბალანსი დადებითია და 2012 წლის I კვარტალში 203.0 მლნ აშშ დოლარს (337.0 მლნ ლარს) შეადგენს. აქედან, მომსახურების ექსპორტი 496.2 მლნ აშშ დოლარია (823.8 მლნ ლარი), რაც 2.9 პროცენტით ნაკლებია წინა კვარტალთან და 25.0 პროცენტით მეტი 2011 წლის ანალოგიურ კვარტალთან შედარებით. მომსახურების იმპორტი 293.2 მლნ აშშ დოლარია (486.8 მლნ ლარი), რაც 19.1 პროცენტით მეტია 2011 წლის ანალოგიურ პერიოდთან შედარებით, ხოლო წინა კვარტალის მაჩვენებელზე 15.5 პროცენტით ნაკლებია.
მომსახურებით ვაჭრობიდან ყველაზე მაღალი დადებითი ბალანსით ტურისტული მომსახურება გამოირჩევა (187.3 მლნ აშშ დოლარი ანუ 311.0 მლნ ლარი), რომელიც 2012 წლის I კვარტალში წინა კვარტალთან შედარებით 2.6 პროცენტით, ხოლო წინა წლის ანალოგიურ პერიოდთან შედარებით 53.9 პროცენტით გაიზარდა. მეორე დადებითი კომპონენტი, სატრანსპორტო მომსახურება 37.4 მლნ აშშ დოლარს (62.0 მლნ ლარი) შეადგენდა, რომლის ექსპორტი წინა კვარტალთან შედარებით 3.0 პროცენტით შემცირდა, ხოლო წინა წლის შესაბამის პერიოდთან შედარებით 8.9 პროცენტით გაიზარდა. სატრანსპორტო მომსახურების იმპორტი წინა კვარტალთან შედარებით 18.5 პროცენტით შემცირდა, ხოლო წინა წლის შესაბამის პერიოდთან შედარებით 18.8 პროცენტით გაიზარდა.
შემოსავლის ბალანსმა 2012 წლის I კვარტალში -62.0 მლნ აშშ დოლარი (-103.0 მლნ ლარი) შეადგინა. შემოსავლის კრედიტი 201.2 მლნ აშშ დოლარი (334.1 მლნ ლარი), 1.7 პროცენტით ნაკლებია წინა კვარტალის და 29.5 პროცენტით მეტი 2011 წლის I კვარტალის მაჩვენებელზე. შემოსავლის დებეტმა -263.2 მლნ აშშ დოლარი (-437.0 მლნ ლარი) შეადგინა, რაც 0.4 პროცენტით ნაკლებია წინა კვარტალთან და 26.3 პროცენტით მეტი გასული წლის ანალოგიურ პერიოდთან შედარებით.
მიმდინარე ტრანსფერები მიმდინარე ანგარიშის ყველაზე მსხვილი დადებითი კომპონენტია და 316.4 მლნ აშშ დოლარს (525.3 მლნ ლარს) შეადგენს, რაც წინა კვარტალთან შედარებით 19.5 პროცენტით ნაკლები, ხოლო წინა წლის შესაბამის პერი-ოდთან შედარებით 11.7 პროცენტით მეტია. აქედან, 341.2 მლნ აშშ დოლარი (566.4 მლნ ლარი) მიღებული, ხოლო 24.8 მლნ აშშ დოლარი (41.2 მლნ ლარი) გაცემული ტრანსფერებია. 2012 წლის I კვარტალში სამთავრობო სექტორის წმინდა ტრანსფერები წინა წლის შესაბამის პერიოდთან შედარებით 28.1 პროცენტით შემცირდა, ხოლო სხვა სექტორებისა - 15.5 პროცენტით გაიზარდა.
კაპიტალური ტრანსფერების წმინდა შემოდინებამ 2012 წლის I კვარტალში 10.8 მლნ აშშ დოლარი (18.0 მლნ ლარი) შეადგინა, რაც წინა კვარტალთან შედარებით 49.6 პროცენტით, ხოლო 2011 წლის I კვარტალთან შედარებით 80.3 პროცენტით ნაკლებია. წმინდა პირდაპირი უცხოური ინვესტიციები 2012 წლის I კვარტალში 228.7 მლნ აშშ დოლარს (379.7 მლნ ლარს) შეადგენს. ამავდროულად, საქართველოში განხორციელებული პირდაპირი უცხოური ინვესტიციები მოცემულ პერიოდში 269.4 მლნ აშშ დოლარს (447.2 მლნ ლარს) გაუტოლდა, რაც 20.5 პროცენტით ნაკლებია წინა კვარტალთან და 53.7 პროცენტით მეტი 2011 წლის ანალოგიურ პერიოდთან შედარებით. საქართველოში განხორციელებული პირდაპირი უცხოური ინვესტიციებიდან ინვესტიცია სააქციო კაპიტალში შეადგენდა 145.2 მლნ აშშ დოლარს (241.0 მლნ ლარს), რეინვესტირებული შემოსავალი - 96.5 მლნ აშშ დოლარს (160.2 მლნ ლარს), ხოლო სხვა კაპიტალი - 27.7 მლნ აშშ დოლარს (46.0 მლნ ლარს).
სხვა ინვესტიციების დადებითმა სალდომ 54.9 მლნ აშშ დოლარი (91.2 მლნ ლარი) შეადგინა, საიდანაც აქტივები 75.6 მლნ აშშ დოლარი (125.6 მლნ ლარი) იყო, ხოლო ვალდებულებები -20.7 მლნ აშშ დოლარი (-34.4 მლნ ლარი). სხვა ინვესტიციების ვალდებლებების კლება გამოწვეული იყო სესხების შემცირებით.
სარეზერვო აქტივები 2012 წლის I კვარტალში ოპერაციული ცვლილებით 26.9 მლნ აშშ დოლარით (44.6 მლნ ლარით) შემცირდა.