ჩინეთის სახალხო რესპუბლიკის დედაქალაქ ქ. პეკინში გამართულ დიპლომატიურ კონფერენციაზე მიღებულ იქნა ,,აუდიოვიზუალური შესრულებების დაცვის პეკინის შეთანხმება". დიპლომატიურ კონფერენციას წარმომადგენელთა რეკორდული რაოდენობა დაესწრო, მათ შორის ინტელექტუალური საკუთრების მსოფლიო ორგანიზაციის (ისმო) 156 წევრი ქვეყნის მაღალი რანგის თანამდებობის პირები, 6 მთავრობათაშორისი ორგანიზაციისა და 45 არასამთავრობო ორგანიზაციის წარმომადგენელი. საქართველოს მხრიდან კონფერენციაში მონაწილეობდა საქპატენტის დელეგაცია თავმჯდომარის ირაკლი ღვალაძის ხელმძღვანელობით. აღნიშნულმა დიპლომატიურმა კონფერენციამ, შეთანხმების მიღებით, წარმატებით დაასრულა ისმო-ს ეგიდით გამართული 12 წლიანი მოლაპარაკებათა პროცესი. კონფერენციაზე შეთანხმება შეფასდა, როგორც „ეპოქალური საერთაშორისო აქტი" საავტორო უფლებების სფეროში, რომელიც ხელს შეუწყობს ფილმების მსახიობთა და სხვა შემსრულებელთა პირადი ქონებრივი და არაქონებრივი უფლებების გაძლიერებას და დაცვას, დაეხმარება შემსრულებლებს დამატებითი შემოსავლის მიღებაში. კონფერენციაზე წარმოდგენილი ქვეყნებიდან 122-მა ქვეყანამ ხელი მოაწერა შეთანხმების საბოლოო აქტს, ხოლო 48 ქვეყანამ ხელი მოაწერა თვით შეთანხმებას. აღნიშნული შეთანხმება ძალაში შევა მას შემდეგ, რაც მოხდება მისი რატიფიცირება 30 უფლებამოსილი მონაწილე მხარის მიერ.
აღსანიშნავია, რომ კონფერენციის მნიშვნელობიდან გამომდინარე მონაწილეებს მიესალმენ ცნობილი მსახიობები, მათ შორის მერილ სტრიპი, სონია ბრაგა, ხავიერ ბარდემი, ანტონიო ბანდერასი და სხვ.
