საქართველო ჩინეთში ქართული დასახელებების რეგისტრაციის პროცესს დაიწყებს. ამ თემაზე ჩინეთში ვიზიტის ფარგლებში "საქპატენტის" თავმჯდომარემ ირაკლი ღვალაძემ შეხვედრა გამართა ჩინეთის რესპუბლიკის სასაქონლო ნიშნების უწყების ხელმძღვანელთან ჰიუ რუი ბიაოსთან.
საქართველო, პირველ ეტაპზე, ჩინეთის რესპუბლიკის სასაქონლო ნიშნების უწყებაში სარეგისტრაციოდ წარადგენს ქართული ღვინისა და მინერალური წყლის ადგილწარმოშობის დასახელებებს, ხოლო შემდგომში დარეგისტრირდება ასევე ქართული ყველისა და სოფლის მეურნეობის სხვა პროდუქტების გეოგრაფიულ აღნიშვნები.
ჩინურმა მხარემ, თავის მხრივ, გამოხატა მზადყოფნა სწრაფად და შეუფერხებლად წარმართოს ქართული დასახელებების რეგისტრაციის პროცესი.