საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი კობა სუბელიანი და ბაღდათის მაჟორიტარი დეპუტატი თემურ კოხოძე ბაღდათში კომპაქტურად ჩასახლებულ დევნილ ოჯახებს შეხვდნენ.
ბაღდათში ყოფილი საავადმყოფოს შენობის რეკონსტრუქცია და რეაბილიტაცია დაიწყება, სადაც ახალგარემონტებული და კეთილმოწყობილი ბინა იქნება, რომელიც სრულად დააკმაყოფილებს ბაღდათის 11 კომპაქტურ ობიექტში და ასევე კერძო სექტორში მცხოვრებ სულ 150 მდე დევნილ ოჯახს.
48 ოჯახი აფხაზეთის ომის შემდეგ ბაღდათის რაიონის 11 სხვადასხვა კომპაქტურ ობიექტში ცხოვრობს. წლების მანძილზე ამ შენობებში ცხოვრება გაუსაძლისი ხდებოდა. შენობების ნაწილი ავარიულია.
რეაბილიტაციის შედეგად 150-მდე დევნილი ოჯახი დაკმაყოფილდება საცხოვრებელი პირობებით და აღნიშნული ფართები მათ საკუთრებაში გადაეცემათ. საქართველოს პრეზიდენტის განკარგულებით კი 2 წლის განმავლობაში ამ ბინების გაყიდვის შემთხვევაში ბიუჯეტში თანხას არ გადაიხდიან.
