ბათუმში ევრობანკის ორგანიზებით მუნიციპალური ტრანსპორტის თემაზე საერთაშორისო კონფერენცია მიმდინარეობს, რომელსაც მსოფლიოს რვა ქვეყნის ტრანსპორტის დარგის ექსპერტები და ვიცე-მერები ესწრებიან. სემინარი ბათუმის მერმა რობერტ ჩხაიძემ გახსნა.
საქალაქო ტრანსპორტის სფეროში განხორციელებული რეფორმები სემინარის მონაწილეებს დეტალურად "ბათუმის ავტოტრანსპორტის" დირექტორმა გააცნო. ბათუმის პროექტი ყველაზე წარმატებულად არის შეფასებული იმ პროექტებს შორის, რომლებიც ევრობანკმა აზიასა და ევროპაში დააფინანსა.
სწორედ ევრობანკის წარმომადგენელთა სურვილი იყო სემინარი ბათუმში ჩატარებულიყო და ბათუმის მოდელზე გაეცნო პოტენციურ პარტნიორებისთვის კარგად ფუნქციონირებადი, ეფექტური, უსაფრთხო, ურბანული ტრანსპორტის დანერგვის უპირატესობა.
მსგავსი სისტემა უკვე წარმატებით მუშაობს ბელგრადსა და სოფიაში, ცენტრალური აზიის ქვეყნებიდან კი ევრობანკის ერთ-ერთ აქტიურ პარტნიორად ყირგიზეთი ითვლება. ბიშკეკში მუნიციპალური სატრანსპორტო სისტემის რეფორმირების პროცესი უკვე დაწყებულია.
ურბანული ტრანსპორტის თემაზე სემინარი ბათუმში ორ დღეს გაგრძელდება.
