საპარლამენტო უმრავლესობა ამნისტიასთან დაკავშირებით "ქართული დასის" კანონპროექტს მხარს არ უჭერს. როგორც დასის ლიდერმა ჯონდი ბაღათურიამ იურიდიული კომიტეტის დღევანდელ სხდომაზე განმარტა, კანონპროექტი ამნისტიას სულ 49 მუხლით გასამართლებულ ადამიანებზე გულისხმობას, რომელთაგან ზოგი სრულად გათავისუფლებას და ზოგის განახევრებას შეეხება.
ბაღათურიას თქმით, მუხლების შერჩევის პრინციპი იყო საზოგადოების უსაფრთხოების შენარჩუნება. იგი მიიჩნევს, რომ ნარკოტიკების მომხმარებლები, ასევე მძიმე და უკურნებელი სენით დაავადებულები პატიმრობიდან სრულად უნდა გათავისუფლდნენ.
ადამიანის უფლებათა დაცვის კომიტეტის თავმჯდომარე ლაშა თორდია აცხადებს, რომ შეწყალების აქტები ისედაც ხშირად ხორციელდება და აღნიშნული სახის ამნისტია ქვეყანას დაუსჯელობის სინდრომის ეპოქაში დააბრუნებს. იგი მიიჩნევს, რომ აღნიშნული კანონპროექტი წინასაარჩევნო პროპაგანდის ნაწილია.
"შეწყალების დროს ხდება ინდივიდუალური შესწავლა თუ რამდენად უსაფრთხოა ესა თუ ის პატიმარი საზოგადოებისთვის. არ შეიძლება არჩევნებს გადავაყოლოთ საზოგადოების უსაფრთხოება.
თორდიას დაეთანხმა იურიდიული კომიტეტის თავმჯდომარე პავლე კუბლაშვილიც. იგი მიზანშეუწონლად მიიჩნევს ამნისტიას, მათ შორის ნარკომომხმარებლების მიმართაც.
"ახლა პოლიტიკური კეკლუცობის დრო არ არის. ჩვენ არ ვაპირებთ თეთრი ბაირაღების გამოფენას ციხეებთან. სწორედ გატარებული ღონისძიებებით გავხდით ყველაზე უსაფრთხო ქვეყანა და ამის შეცვლას არ ვაპირებთ", - აღნიშნა კუბლაშვილმა.
ბაღათურიამ საპარლამენტო უმრავლესობას მოუწოდა, დაესახელებინათ რამდენიმე მუხლი მაინც, რომელის ამნისტირებაც მათთვის მისაღებია. მისი თქმით, აღნიშნული კანონპროექტი შესაძლოა დარეგისტრირდეს, არა როგორც "ქართული დასის" არამედ, როგორც იურიდიული კომიტეტის ინიციატივა. მიუხედავად შეთავაზებისა, კომიტეტმა "ამნისტიის შესახებ" კანონპროექტს მხარი არ დაუჭირა.
