პრემიერ-მინისტრმა აშშ-ს სახელმწიფო მდივანს საქართველოს ღია მხარდაჭერისთვის მადლობა გადაუხადა. ნიკა გილაურმა საქართველო-აშშ-ს ქარტიის სხდომაზე განაცხადა, რომ აშშ-მ ბევრი გააკეთა საქართველოსთვის ეკონომიკური მიმართულებითაც. სხდომაზე ნიკა გილაურმა აშშ-ს მთავრობის მიერ გაწეულ ფინანსურ მხარდაჭერასაც გაუსვა ხაზი და განაცხადა, რომ "ათასწლეულის გამოწვევის კორპორაციის: მიერ გამოყოფილი მეორე კომპაქტით, ქვეყანაში განათლების პროექტების დაფინანსება მოხდება.
"საქართველოს დამოუკიდებლობის აღდგენის შემდგომი პერიოდიდან აშშ-ს ფინანსური დახმარება მძლავრი კატალიზატორია დემოკრატიული ტრანსფორმაციისა და რეფორმების პროცესის, რომელიც ქართველმა ხალხმა დაიწყო თითქმის 10 წლის წინ. განსაკუთრებით მინდა ავღნიშნო "ათასწლეულის გამოწვევის კორპორაციის" გადაწყვეტილება, საქართველოსათვის მეორე კომპაქტის მინიჭების ფარგლებში განათლების სფეროში პროექტების განხორციელების შესახებ. მსურს განსაკუთრებით ხაზი გავუსვა იმას, თუ რამდენად ვაფასებთ თქვენს პირად წვლილს საქართველოს როგორც რეგიონში დემოკრატიული ტრანსფორმაციისა და ეკონომიკური რეფორმების სანიმუშო გატარებისა და სამომავლოდ თავისუფალი ვაჭრობის ხელშეკრულებაზე მუშაობის დაწყების კუთხით. ჩვენ გვჯერა, რომ საქართველოსა და აშშ-ს შორის თავისუფალი ვაჭრობის ხელშეკრულების გაფორმებასუდიდესი პოლიტიკური და ეკონომიკური მნიშვნელობა ექნება. ჩვენ მტკიცედ გვწამს, რომ თავისუფალი ვაჭრობის შესახებ ხელშეკრულების გაფორმება საუკეთესო ალტერნატივაა ჩვენს ქვეყნებს შორის სავაჭრო და საინვესტიციო ურთიერთობების გაღრმავებისთვის",- აღნიშნა გილაურმა.
