განათლებისა და მეცნიერების საპარლამენტო კომიტეტის თავმჯდომარე გიორგი გაბაშვილი სპეციალური სერიის ატესტატების გაცემას ეთნიკურ ქართველებზე მიზანშეწონილად მიიჩნევს.
როგორც მან დღეს ჟურნალისტებტან განაცხადა, ზოგადად, სპეციალური სერიის ატესტატების გამონაკლისი, ეთნიკური უმცირესობებისთვის დაიშვა. თუმცა გაბაშვილისთვის დამაკმაყოფილებელია ის განმარტება, რასაც განათლების სამინისტრო 14 ქართველი ბავშვისთვის იმავე სერიის დოკუმენტების გაცემასთან დაკავშირებით აკეთებს.
გაბაშვილის მტკიცებით, მისთვის უცნობია, არიან თუ არა ეს ბავშვები მაღალჩინოსანთა შვილები. მათი ვინაობის დადგენას კი ჟურნალისტებს, განათლებისა და მეცნიერების სამინისტროში ურჩევს.
"როგორც განათლების სამინისტრომ აღნიშნა, ეს იყვნენ ბავშვები, რომელთა გამოცდების ჩაბარება სხვაგან დროში არ ემთხვეოდა საქართველოს საატესტატო გამოცდების გრაფიკს. ამიტომ მათ მისცეს ნებართვა, გამოცდა ჩაებარებინათ იქ, მაგრამ, ბუნებრივია აქ ვერ მისცემდნენ ატესტატს და მისცეს გამონაკლისი დოკუმენტი, რომელსაც ისინი აქ ვერ გამოიყენებენ", - განაცხადა გაბაშვილმა და დასძინა, რომ ასეთი დოკუმენტის გაცემა მომავალშიც არის შესაძლებელი, რადგან ეს არ არის ყალბი ატესტატი, როგორც ამას მაია მომინოშვილი აცხადებს.
შეგახსენებთ, გამოცდების ეროვნული ცენტრის ყოფილი დირექტორის მაია მიმინოშვილის მიერ ყალბი ატესტატების გაცემის ბრალდებასთან დაკავშირებით, გაბაშვილმა გასულ დღეებში განაცხადა, რომ ეს იყო სპეციალური სერიის დოკუმენტები, რომლითაც მხოლოდ ეთნიკურად არაქართველი მოსწავლეები ისარგებლებენ.
