საქართველოსა და მოლდოვას ეროვნულ ბანკებს შორის ორმხრივი თანამშრომლობის მემორანდუმი გაფორმდა. ურთიერთანამშრომლობის მემორანდუმს ხელი საქართველოს ეროვნული ბანკის პრეზიდენტმა გიორგი ქადაგიძემ და მოლდოვას ეროვნული ბანკის პრეზიდენტმა დორინ დრაგატანუმ მოაწერეს.
აღსანიშნავია, რომ დორინ დრაგუტანუმ თავად გამოთქვა საქართველოში ჩამოსვლის სურვილი, რათა ადგილზე გაცნობოდა გატარებული ინოვაციური რეფორმებით მიღწეულ შედეგებს.
"საქართველოს ევროპაში ძალიან კარგი იმიჯი აქვს. ეს არის ქვეყანა, რომელიც მეთად საინტერესოა და მნიშვნელოვან რეფორმებს ატარებს. მოლდოვას ეროვნული ბანკი დაინტერესებულია ითანამშრომლოს საქართველოს საბანკო სექტორთან. სამწუხაროა, რომ მოლდოვას ბანკები ამ ეტაპზე განვითარების სტადიაზე არიან და სავარაუდოდ მალე ქართულ ბაზარზე შემოსვლას ვერ შეძლებენ", - აღნიშნა დორინ დრაგატანუმ
საქართველოსა და მოლდოვას ცენტრალურ ბანკებს შორის გაფორმებული შეთანხმების მიზანია თანამშრომლობის გაღრმავება ორი ქვეყნის საფინანსო სექტორებს შორის. შეთანხმების თანახმად, მხარეები იღებენ ვალდებულებას თავიანთი კომპეტენციის ფარგლებში ხელი შეუწყონ საქართველოსა და მოლდოვას რესპუბლიკის საბანკო და საფინანსო ინსტიტუტებს შორის საქმიანი ურთიერთობების დამყარებას, ასევე გაუზიარონ ერთმანეთს დანერგილი წარმატებული გამოცდილება.
„დღეს თანამშრომლობის მემორანდუმი გაფორმდა არა მხოლოდ ორ უწყებას შორის, არამედ ორი ქვეყნის საფინანსო და საბანკო სექტორებს შორის, ჩვენ ამით ხელს შევუწყობთ ბიზნესების დაახლოებას, ერთობლივი პროექტების ინიცირებასა და ხელშეწყობას. ამ მემორანდუმის ამოცანაა ვაჭრობის ზრდა და მაქსიმალურად გაფართოება ჩვენი სავაჭრო პარტნიორების"- განაცხადა გიორგი ქადაგიძემ.
მემორანდუმი ასევე ითვალისწინებს კონფიდენციალურობის დაცვის მიზნით ინფორმაციის გაცვლაზე შესაძლო შეზღუდვებს. მხარეებს შორის ინფორმაციის და გამოცდილების გაცვლის მიზნით ჩატარდება სამუშაო ვიზიტები.