ღამით მოსული ძლიერი სეტყვის შედეგად, ლაგოდეხის რაიონის სოფლებში ბაისუბანსა და ზემო და ქვემო მსხალგორში ვენახები და საგაზაფხულო ნათესები დაისეტყვა.
როგორც კახეთის საინფორმაციო ცენტრს ბაისუბნის თემის რწმუნებულმა მალხაზ მაჭარაშვილმა განუცხადა, სტიქიის შედეგად, ყველაზე მეტად ზემო მსხალგორი დაზარალდა.
„სეტყვა ღამის პირველ საათზე მოვიდა და 15 წუთი გაგრძელდა. საგაზაფხულო ნათესები სერიოზულად დაზიანდა. წინასწარი ინფორმაციით, მოსავალი ზოგიერთ ადგილას 30%-დან 80%-მდეა განადგურებული. ამჟამად მიმდინარეობს სტიქიის შედეგად მიყენებული ზარალის დათვლა და მისი ზუსტი ოდენობა რამდენიმე დღეში გახდება ცნობილი", - აღნიშნა მალხაზ მაჭარაშვილმა.
