პარლამენტის თავმჯდომარე დავით ბაქრაძის შეფასებით, ჩიკაგოში მიღებული დეკლარაციით დადასტურებულია, რომ საქართველო ნატოს წევრი გახდება.
როგორც მან პარლამენტის Dდღევანდელ ბიუროს სხდომაზე, ჩიკაგოში მიმდინარე ნატოს სამიტზე მიღებული დეკლარაციის შეფასებისას განაცხადა, საქართველო იმ ქვეყნების რიცხვშია, რომელიც ნატოში გაფართოების პირველივე ტალღისთანავე მოხვდება.
დავით ბაქრაძის განცხადებით, უაღრესად პოზიტიური და ძალიან მნიშვნელოვანია ის რაც ამ დოკუმენტშია დაფიქსირებული საქართველოსთან მიმართებაში, მასში მხარდაჭერილია საქართველოს ტერიტორიული მთლიანობა და არის მოწოდება რუსეთის მიმართ აფხაზეთისა და ცხინვალის რეგიონებთან დაკავშირებით.
,,პრაქტიკულად ყველა საკითხში, რომელიც ჩვენთვის არის მნიშვნელოვანი დოკუმენტი არის ძალიან მკაფიო და ქართული მხარისთვის აბსოლუტურად მისაღები. ეს არის უმნიშვნელოვანესი ვინაიდან ეს დოკუმენტი პრაქტიკულად გამოხატავს მსოფლიოს თანამეგობრობის ყველაზე დემოკრატიული და განვითარებული ნაწილის პოზიციას,, - განაცხადა ბაქრაძემ.
მისივე თქმით, ყველას უნდა ესმოდეს, რომ რეალურად საქართველო 2008 წლის ბუქარესტის სამიტის მერე ბევრად უფრო დაუახლოვდა ნატოს.
,,ბუქარესტში მიღებულ ევროპის დაპირებას, არ მოჰყოლია დროში განსაზღვრული და გაწერილი მექანიზმი და საქართველო და უკრაინა იყვნენ გარკვეულწილად ამოვარდნილები პრაქტიკული მექანიზმებიდან. ჩიკაგოში მიმდინარე მოვლენები გვიჩვენებს, რომ საქართველო გადავიდა სრულიად კონკრეტულ გარემოში და კონკრეტულ კონტექსტში. ის, რომ საქართველო დღეს ასპირანტ ქვეყნად მოიხსენიება, დასავლეთ ბალკანეთის სამ სახელმწიფოსთან ერთად ნიშნავს იმას, რომ საქართველო სრულიად კონკრეტულად განიხილება იმ ქვეყნების რიცხვში, რომლებიც პირველივე გაფართოების ტალღის დროს შესაძლებელია გახდნენ ნატოს წევრები,, - აღნიშნა პარლამენტის თავმჯდომარემ.
მისი თქმით, საქართველო მადლობელია იმ ქვეყნების, ვინც ჩიკაგოში მხარი დაუჭირა აღნიშნულ დოკუმენტს.
,,ეს ყველაფერი გვაძლევვს ოპტიმიზმის საფუძველს და იმის რწმენას, რომ საქართველო დგას სწორ გზაზე, საქართველო ვითარდება სწორად და ჩვენ ახლო მომავალში აუცილებლად შევძლებთ შევასრულოთ ჩვენი ამოცანა და ამბიცია, რომელიც გახლავთ საქართველოს გაწევრიანება ჩრდილოატლანტიკურ ალიანსში და ამ თვალთაზრისით ჩიკაგოს სამიტი უდაოდ იყო წინ გადადგმული ნაბიჯი", - დასძინა ბაქრაძემ.
შეგახსენებთ, რომ ჩიკაგოში ნატოს სამიტი 20 მაისს გაიხსნა. მასში მონაწილე საქართველოს დელეგაციას პრეზიდენტი მიხეილ სააკაშვილი ხელმძღვანელობს.
