პარლამენტის თავმჯდომარე დავით ბაქრაძემ შვედეთის სამეფოს პარლამენტის საგარეო საქმეთა კომიტეტში მოდერატების პარტიის წევრებთან შეხვედრაზე საქართველოში მიმდინარე რეფორმების შესახებ ისაუბრა. შეხვედრაზე ასევე ყურადღება გაამახვილეს საქართველოსა და ევროკავშირის თანამშრომლობის პერსპექტივებზე.
როგორც შეხვედრაზე აღინიშნა, საქართველო-ევროკავშირს შორის ურთიერთობის განვითარებაში გამორჩეული წვლილი შვედეთის მხარესაც მიუძღვის, რადგან შვედეთის საგარეო საქმეთა მინისტრი აღმოსავლეთ პარტნიორობის შექმნის თანაინიციატორი იყო და ჩვენი რეგიონი ევროკავშირის ყურადღების ცენტრში აღმოჩნდა.
ქართულმა მხარემ შვედეთის სამეფოს პარლამენტის საგარეო საქმეთა კომიტეტის წევრებს ევროკავშირის აღმოსავლეთის პარტნიორობის ინიციატივებში აქტიური მონაწილებისთვის მადლობა გადაუხადა.
შეხვედრაზე საუბარი საქართველოში დაგეგმილ საპარლამენტო არჩევნებს დაეთმო. შვედეთის მხარემ მზადყოფნა გამოთქვა არჩევნებზე დამკვირვებლები გამოაგზავნოს და არჩევნების მაქსიმალურად გამჭვირვალედ და ობიექტურად ჩატარებას ხელი შეუწყოს.
შეხვედრას საქართველოს საგანგებო და სრულუფლებიანი ელჩი შვედეთის სამეფოში კონსტანტინე ქავთარაძე ესწრებოდა.
დღესვე შვედეთის სამეფოს პარლამენტის საგარეო საქმეთა კომიტეტში მოდერატების პარტიის წევრები საქართველოს პარლამენტის თავმჯდომარის პირველ მოადგილეს მიხეილ მაჭავარიანს შეხვდნენ.
შვედეთის სამეფოს პარლამენტის საგარეო საქმეთა კომიტეტში მოდერატების პარტიის წევრები საქართველოს ოთხდღიან სამუშაო ვიზიტით 12 მაისს ეწვივნენ. მათ შეხვედრები ჰქონდათ საქართველოს აღმასრულებელი ხელისუფლებისა და სხვადასხვა უწყების წარმომადგენლებთან. ვიზიტის ფარგლებში მათ საქართველოს ღირსშესანიშნაობებიც მოინახულეს.
