საქართველოს პრეზიდენტი მიხეილ სააკაშვილი ყვარელში, ილია ჭავჭავაძის სახლ-მუზეუმში, კომპიუტერული ცოდნის გამავრცელებელი საზოგადოების პრეზენტაციაზე სიტყვით გამოვიდა. პრეზიდენტის შეფასებით, კომპიუტერის ცოდნის გამავრცელებელი საზოგადოება ილია ჭავჭავაძის მიერ დაარსებული წერა-კითხვის გამავრცელებელი საზოგადოების ტოლფასია.
პრეზიდენტმა ცოდნის შესახებ ილია ჭავჭავაძის ცნობილი სიტყვები გაიხსენა - ცოდნა ანთებულ სანთელს ჰგავს - და აღნიშნა, რომ დაახლოებით იგივე სანთელი არის დღეს კომპიუტერი.
"დაახლოებით იგივე სანთელი შეიძლება დღეს არის კომპიუტერი. ახლანდელ დროში ცოდნას უფრო დიდი ბაზარი აქვს. ფულზე უფრო ძლიერია და ხმალზე უფრო ძლიერად ჭრის. ჩვენ ვართ 7-მილიარდიოან სამყაროში 5 მილიონზე ცოტა ნაკლები ქვეყანა. რითი შეგვიძლია ფონს გასვლა, რითი შეგვიძლია წარმატების მიღწევა? - ცოდნით - ამაზე ილია ჭავაჭავაძე გვაძლევს პასუხს. დავიწყეთ ახალი პროგრამები, კომპიუტერიზაცია სკოლებში, ინგლისურის სწავლება, სუბტიტრების დადება ფილმებზე, რომ ხალხმა უკეთ მოისმინოს, იმიტომ, რომ მარტო კომპიუტერი არ კმარა. თუ კომუნიკაცია არ გაქვს ინგლისური, ვერ გაიგებ, იმ კომპიუტერში რა ინფორმაციაა. მაშინ მართლა უნდა დაჯდე "ოდნაკლასნიკზე" ან ადგილობრივ საიტზე მხოლოდ. როდესაც ჩვენ ეს პროგრამები დავიწყეთ, ბევრი ადამიანი ამბობდა, რომ რა დროს ეგ არის, როცა უამრავ ადამიანს შია. რა თქმა უნდა, დღეს ბევრს უჭირს, მაგრამ შიმშილი დღეს აღარ არის, თუმცა ბრძოლა არსებობისთვის რომ შიმშილი არ იყოს, არის ძალიან მწვავე. და ისევ ილია ჭავჭავძე პასუხობს ამას", - განაცხადა პრეზიდენტმა
მისი თქმით, იგი დარწუნებულია, რომ ილია ჭავჭავაძეს ძალიან მოეწონებოდა საბაჟო ტერმინალები, სადაც ტვირთი გადის უცხოეთში.
"დარწმუნებული ვარ ილია ჭავჭავაძეს ძალიან მოეწონებოდა ჩვენი საბაჟო ტერმინალები, სადაც ტვირთი გადის უცხოეთში. იმიტომ, რომ ძალიან ბევრს წერდა თავისუფალ ვაჭრობაზე. წერდა იმაზე, რამდენად მნიშვნელოვანია, საზღვარზე გადადაიოდეს ტვირთი ყოველგვარი შეფერხების გარეშე", - აღნიშნა პრეზიდენტმა.
მიხეილ სააკაშვილმა 1900 წელს "ივერიაში" გამოქვეყნებულ ილია ჭავაჭავაძის წერილის შინაარსი გაიხსენა: "ამაზე წერდა ძალიან დეტალურად და განიხილავდა, როგორ უნდა გაგვეკეთებინა ღვინო, რომ უკეთესად წასულიყო ბაზარზე. რომ წაიკითხოთ ეს სტატია, გეგონებათ დღევანდელ დღესაა დაწერილი".
პრეზიდენტმა ასევე აღნიშნა, რომ რამდენიმე წლის წინ ქართული ღვინის დალევა პრაქტიკულად იყო შეუძლებელი, იმდენად უხარისხო იყო, მაგრამ დღეს ეს პრობლემა მოგვარებულია.
"რუსეთმა შარი მოგვდო, თითქოს ჩვენს ღვინოში საწამლავია. რა თქმა უნდა, არ არის, მაგრამ ფაქტია, რომ რამდენიმე წლის წინ ქართული ღვინის დალევა პრაქტიკულად იყო შეუძლებელი, იმდენად უხარისხო იყო. ახლა ამის თქმა არ შეიძლება. დიდი მადლობა მოძმე რუსეთს - მათ გვაიძულეს, გამოგვეშვა უკეთესი ღვინო", - განაცხადა პრეზიდენტმა.
ცნობისთვის, იუსტიციის სამინისტროს ინიციატივით, პირველ ეტაპზე საქართველოს სამასამდე სოფელშია კომპიუტერული ცენტრების შექმნა დაგეგმილი. ამ ცენტრებში მოსახლეობას შესაძლებლობა ექნება ისწავლოს ინტერნეტით სარგებლობა, მათ შორის, მათთვის საჭირო ინფორმაციის მიღება და უფრო მეტიც, საკუთარი პროდუქციის Online გაყიდვა. პროექტის მიზანია, რეგიონის მოსახლეობისთვის თანამედროვე ტექნოლოგიების ათვისების შესაძლებლობის მიცემა, რათა მიღებული ცოდნა ბიზნესსაქმიანობაში პრაქტიკულად გამოიყენონ.
კომპიუტერული მომსახურების ცენტრებში ადგილობრივი ინსტრუქტორები იმუშავებენ.
დაინტერესებული პირებისთვის კონსკურსი 15 ივნისიდან გამოცხადდება.
