"იმელის" ყოფილ შენობაში "მილენიუმის" სასტუმრო განთავსდება. თბილისის მერიის ინფორმაციით, საქართველოში ორდღიანი ოფიციალური ვიზიტით იმყოფება არაბეთის გაერთიანებული საემიროების დელეგაცია, აბუ დაბის შეიხ ნაიან მაბარაკ ალ ნაიანის მეთაურობით. ნაიან მაბარაკ ალ ნაიანი არის არაბეთის გაერთიანებული საემიროების უმაღლესი განათლების მინისტრი, საემიროების Union National Bank- ის თავმჯდომარე, უნივერსიტეტის რექტორი, შპს "დაბი კონტრაქტინგისა" და "დაბი გრუპის" თავმჯდომარე.
აღნიშნული კომპანიის საკუთრებაა რუსთაველის გამზირზე მდებარე ყოფილი იმელის შენობა.
დღეს "დაბი გრუპის" აღმასრულებელი ხელმძღვანელი, შეიხის წარმომადგენელი საქართველოში სემ ედუარდი და სასტუმროთა ქსელ "მილენიუმის" ვიცე-პრეზიდენტი მანფრედ სიმონსი, ხელს მოაწერენ ხელშეკრულებას, რომლის თანახმად, ყოფილი იმელის შენობის რეკონსტრუქციის შემდეგ, კომპანია "მილენიუმი" სასტუმროს ოპერატორი გახდება.
ცნობილია, რომ შენობა სრულად შეინარჩუნებს ისტორიულ იერსახეს და იქნება ერთ-ერთი მაღალი დონის სასტუმრო, რომელიც თბილისის სტუმრებს მოემსახურება.
ინვესტორი სასტუმროს მშენებლობაზე 40 მილიონი დოლარის ინვესტიციას განახორციელებს. მშენებლობაზე 100-ობით სამუშაო ადგილი შეიქმნება. სამშენებლო სამუშაო ორ წელიწადში დასრულდება.
