რატომ დატოვა დავით ლორთქიფანიძემ "ქრისტიან-დემოკრატიული" მოძრაობა და რატომ შეაჩერა არჩევანი მაინც და მაინც ბიძინა ივანიშვილის პარტიაზე, - ამ საკითხზე "ჯი-ეიჩ-ენს" დავით ლორთქიფანიძე ესაუბრა.

- ცნობილია, რომ თქვენ დატოვეთ "ქრისტიან-დემოკრატიული" მოძრაობა. რეალურად, რა გახდა თქვენი პარტიიდან წამოსვლის მიზეზი?

- ეს გადაწყვეტილება პოლიტიკური მოსაზრების გამო მივიღე. ის პოლიტიკა, რომელსაც "ქრისტიან-დემოკრატები" ატარებენ, განსაკუთრებით ბოლო წლებში, ხელისუფლების ცვლილებასთან დაკავშირებით, ჩემთვის მიუღებელია. ვგულისხმობ ხელისუფლების ეტაპობრივ ცვლილებასა და სხვა ხელისუფლებით ჩანაცვლების პოლიტიკას. დღეს ქართული სახელმწიფო ასეთი ფუფუნების საშუალებას არ იძლევა, რადგან დღეს არის ხელისუფლების არჩევნების, კონსტიტუციური გზით ცვლილების რადიკალური აუცილებლობა, წინააღმდეგ შემთხვევაში, ჩვენს ქვეყანას, ფაქტობრივად, მომავალი აღარ აქვს. ჩემი გადაწყვეტილება კიდევ უფრო გამიმყარდა, როდესაც გუშინწინ "ქრისტიან-დემოკრატიული" მოძრაობის ლიდერები, ახვლედიანი და თარგამაძე, ჩავიდნენ ჩემს მშობლიურ რაიონში, ვანში და მოსახლეობას შეხვდნენ. ეს ის მოსახლეობაა, რომელთან ერთადაც უკვე დიდი ხანია ვწვალობ იმაზე, რომ მათი უფლებები დავიცვა. ხელისუფლებამ ვანელებს გაუყიდა საძოვრები და 2500 კომლი დარჩა საძოვრის გარეშე. ცხადია, ამომრჩეველთან შეხვედრას არავის დავუშლი, მაგრამ ეს ხალხი შეკრიბეს ადგილობრივი გამგეობის წარმომადგენლებმა, "ნაცმოძრაობის" აქტივისტებმა და "ქდმ"-ს შეხვედრა მოსახლეობასთან სწორედ მათი ორგანიზებით მოხდა. მოსახლეობასთან შეხვედრაზე "ქრისტიან-დემოკრატიული" მოძრაობის წარმომადგენლები ადგილობრივებს დაჰპირდნენ, რომ ამ საკითხს ხელისუფლებასთან დაარეგულირებენ, გვერდში დაუდგებიან, დაუბრუნებენ საძოვრებს და ა.შ..

- თქვენ ავითარებთ მოსაზრებას, რომ "ქრისტიან-დემოკრატები" ხელისუფლების თამაშს თამაშობენ?

- ამ მოსაზრებას რომ არ ვიზიარებდე, მაშინ ამ გადაწყვეტილებას არ მივიღებდი. რაც რამდენიმე დღის წინ ჩემს მშობლიურ რაიონში მოხდა, ამის საფუძველს კიდევ უფრო მიმძაფრებს. ყველაფრის საზომი არის არჩევნები და არჩევნები გამოაჩენს, ვისი პოზიციაა მართალი. დღეს სერიოზულ გზაგასაყარზე ვდგავართ და ამომრჩეველი, რომელიც არჩევნებზე მივა, გარკვეული უნდა იყოს, ვის უნდა დაუჭიროს მხარი.

- "ქრისტიან-დემოკრატიული" მოძრაობა 15 მარტს დატოვეთ და, ფაქტობრივად, ერთი თვის შემდეგ დააფიქსირეთ თქვენი პოზიცია "ქართული ოცნება - დემოკრატიული საქართველოში" გაწევრიანების შესახებ. ამ პერიოდის განმავლობაში რას ელოდებოდი?

- ამ დროის განმავლობაში მიდიოდა მსჯელობა, ფიქრი, განსჯა. როცა "ქართული ოცნების" წარმომადგენლებთან საბოლოო კონსულტაციის რეჟიმში გადავედით, მივიღე გადაწყვეტილება და გავხდი პოლიტიკური პარტია "ქართული ოცნება - დემოკრატიული საქართველოს" წევრი.

- რატომ შეაჩერეთ არჩევანი მაინც და მაინც ბიძინა ივანიშვილის პარტიაზე?

- ის პოლიტიკური გზა, რომელსაც აქამდე წარმოვადგენდი, ქვეყნის ხვალინდელ დღეს სხვაგვარად ხედავს. დღეს კი აუცილებელია გადაწყვეტილებების მიღება დროულად, ადეკვატურად მოხდეს და ხელისუფლება შეიცვალოს არჩევნების გზით. ამისთვის ივანიშვილს გუნდს აბსოლუტურად ყველა რესურსი აქვს. შეიძლება, მოქალაქეებს გაუჩნდეთ კითხვა, ჩემი გადაწყვეტილება ხომ არ უკავშირდება ფინანსურ ინტერესებს და მინდა დავაფიქსირო, რომ ეს ასე არ არის. მე, პირადად, გადავდგი აბსოლუტურად გააზრებული ნაბიჯი და ვფიქრობ, ეს ნაბიჯი უფრო დაკავშირებულია რისკებთან, ვიდრე ფუფუნებასთან და განცხრომასთან.

- შესაძლოა, გიხილოთ რომელიმე რაიონში მაჟორიტარ დეპუტატად, თუნდაც თქვენს მშობლიურ ვანში?

- ეს უკვე არის პარტიის შიგნით გადასაწყვეტი საკითხი, რომელიც პარტიის პოლიტსაბჭოზე გაირკვევა.

- არსებულ სიტუაციაში, როგორ შეაფასებთ "ქართული ოცნების" შანსებს წარმატების მისაღწევად?

- ხელისუფლება ცდილობს, თავი დაიტოვოს კომფორტულ პირობებში, რადგან თვითონ აქვს რესურსი, ხარჯოს თანხები ქვეყნის ბიუჯეტიდან, როგორც მოესურვება და მოსახლეობაზე მოახდინოს მანიპულირება, მაგრამ მიუხედავად ამისა, მოსახლეობა სწორ არჩევანს გააკეთებს.

"ჯი-ეიჩ-ენი", ესაუბრა მირანდა ნაბახტეველი.