დეპუტატებმა დღეს რამდენიმე კანონპროექტი სხვისი პულტების გამოყენებით მიიღეს. პარლამენტის დღევანდელ პლენარულ სხდომაზე კენჭისყრების დაწყებისას რეგისტრაცია 96 დეპუტატმა გაიარა, თუმცა, დარბაზში ამ დროს 62 დეპუტატი იმყოფებოდა.
კვორუმის უქონლობა, ოპოზიციონერმა დეპუტატმა ჯონდი ბაღათურიამ მხოლოდ მას შემდეგ გააპროტესტა, რაც მისი ალტერნატიული წინადადება - მინიმალური პენსიის საარსებო მინიმუმთან გათანაბრებასთან დაკავშირებით, ჩავარდა.
ბაღათურიას წინადადებასთან დაკავშირებით, ტაბლოზე 10 დადებითი ხმა დაფიქსირდა, რაც საპროცედურო საკითხთა კომიტეტის თავმჯდომარემ ხათუნა გოგორიშვილმა გადაამოწმა და აღმოაჩინა, რომ ბაღათურიას წინადადების მხარდამჭერები დარბაზში არ იმყოფებოდნენ.
ბარათურიამ საპასუხოდ, დარბაზში დეპუტატები დაითვალა და განაცხადა, რომ კვორუმი არ არის, თუმცა მას შეახსენეს, რომ ეს კენჭისყრის დაწყებამდე უნდა ეთქვა და არა კენჭისყრის მიმდინარეობისას. დღევანდელი კენჭისყრა, ათეულობით კანონპროექტზე, სხვისი პულტების აქტიური გამოყენებით წარიმართა.
