ვაშინგტონი მოსკოვისაგან "ნოვაია გაზეტას" ჟურნალისტზე თავდასხმის ობიექტურ გამოძიებას ითხოვს. შეერთებული შტატები რუსეთს მოუწოდებს დამნაშავე პირები შესაფერისად დასაჯონ.
მიუხედავად იმისა, რომ ელენა მილაშინას წინააღმდეგ თავდასხმის ერთადერთ მოტივად რუსულმა პოლიციამ ძარცვა დაასახელა, აშშ-ს სახელმწიფო დეპარტამენტის ოფიციალურმა წარმომადგენელმა ვიქტორია ნულანდმა ეს ფაქტი ეჭვქვეშ დააყენა და ძალადობა მილაშინას ჟურნალისტურ საქმიანობას დაუკავშირა.
თავად დაზარალებული ცემის ფაქტთან დაკავშირებით ოფიციალურ კომენტარს ამ დრომდე არ აკეთებს, თუმცა სოციალურ ქსელში თავდასხმიდან მეორე დღესვე გამოთქვა ეჭვი, რომ ეს ძარცვა არ ყოფილა.
მილაშინა ბოლო ხანებში ხშირად მუშაობდა რუსეთში ადამიანის უფლებათა დარღვევებზე და ამ თემაზე საკმაოდ კრიტიკულ სტატიებსაც წერდა.
მას და მის მეგობარს უცნობი პირები თავს 4 აპრილს გვიან ღამით დაესხნენ.
