7 აპრილს, იუსტიციის სამინისტროს თანამშრომლები დიღმის ტყე-პარკს ესტუმრნენ და გამწვანების აქცია მოაწყვეს. სამინისტროს ორმოცამდე თანამშრომელმა ფიჭვისა და კედარის ასი ნერგი დარგო, რომელიც მათ თბილისის მერიამ გადასცა.
გამწვანების აქცია „მწვანე პროექტის" ფარგლებში გაიმართა, რომელსაც იუსტიციის სამინისტრო 2012 წლის იანვრიდან ახორციელებს. პროექტი მიზნად ისახავს გარემოს დაცვის ხელშეწყობასა და ცნობიერების ამაღლებას ქაღალდის ეკონომიურად მოხმარებისა და მისი ხელმეორე გადამუშავების მნიშვნელობის შესახებ.
გამწვანების აქციების გარდა, პროექტის ფარგლებში იუსტიციის სამინისტროს სამსახურებში გამოუსადეგარი, ნარჩენი ქაღალდის შეგროვებაც ხდება, რომელიც შემდეგ ქაღალდის გადამამუშავებელ საწარმოებს ბარდება. ამ გზით შემოსული თანხები საქველმოქმედო საქმიანობას მოხმარდება.
