დღეს კომპანია „სისტრამ" თბილისის ტრამვაის პროექტის შესახებ, პრეზენტაციას გამართა, რომელსაც თბილისის მერი გიგი უგულავა, მსოფლიო ბანკის, აზიის განვითარების ბანკის, ევროპის რეკონსტრუქციისა და განვითარების ბანკისა და საფრანგეთის საელჩოს წარმომადგენლები დაესწრნენ.
ტრამვაის შესახებ მომზადებული პროექტი საჯაროა. ნებისმიერ დაინტერესებულ პირს შესაძლებლობა ეძლევა საჯარო დისკუსიაში მიიღოს მონაწილეობა და ნებისმიერ საკითხთან დაკავშირებით, საკუთარი მოსაზრება დააფიქსიროს.
პროექტის განხორციელების შემდეგი ეტაპი დაფინანსებასთან დაკავშირებით, სხვადასხვა საერთაშორისო საფინანსო ინსტიუტებთან მოლაპარაკებებს ითვალისწინებს.
თბილისის მერიის ინიციატივით, ქალაქის საზოგადოებრივ ტრანსპორტს უახლოეს წლებში კომფორტული, სწრაფი, ეკოლოგიურად სუფთა და უსაფრთხო გადაადგილების საშუალება ტრამვაი შეემატება. აღნიშნულ საკითხთან დაკავშირებით 2010 წელს თბილისის მერიასა და ფრანგულ საინჟინრო კომპანია „სისტრას" შორის თანამშრომლობის მემორანდუმი გაფორმდა. მემორანდუმის თანახმად, თბილისის მოსახლეობის გამოკითხვაზე დაყრდნობით, მომზადდა ტრამვაის ქსელის ტექნიკური პროექტი, ეკონომიკური, გარემოსდაცვითი და ფინანსური ანალიზი. განხორციელებული სამუშაოები საფრანგეთის მთავრობამ დააფინანსა.
ცნობისთის, 2009-2010 წლებში ფრანგული საინჟინრო კომპანიის Systra-ს (სისტრა) მიერ თბილისის მერიისათვის მომზადდა გლობალური სტრატეგიული გეგმა, რომელიც მოკლე, საშუალო და ხანგრძლივი ვადებით თბილისის სატრანსპორტო ქსელის მდგრადი განვითარების პერსპექტივებს ითვალისწინებს. აღნიშნულთან საკითხთან დაკავშირებით, თბილისის მერიას, საფრანგეთის მთავრობასა და კომპანია Systra-ს (სისტრა) შორის მიღწეულ იქნა შეთანხმება მოცემული გეგმით გათვალისწინებული ღონისძიებების გატარების შესახებ.
თბილისში გადაწყდა ახალი ტრამვაის ხაზის მშენებლობა, რომელიც მიზნად ისახავს საზოგადოებრივი ტრანსპორტის მომსახურების ხარისხის გაუმჯობესებას. ეკონომიკურ, ტექნიკურ და ფინანსურ კვლევებს მთლიანად საფრანგეთის მთავრობა აფინანსებს.
