ცენტრალური საარჩევნო კომისიის წევრებმა შიდა ქართლის რეგიონის (ხაშური, ქარელი, კასპი, გორი) მედიაწარმომადგენლებთან გამართეს შეხვედრები.
შეხვედრებს საარჩევნო ადმინისტრაციის და ადგილობრივი მედიაწარმომადგენლები ესწრებოდნენ. კომისიის ინიციატივით ორგანიზებული შეხვედრების უმთავრესი მიზანი ურთიერთობების გაღრმავება და სამომავლო თანამშრომლობის საკითხია.
ცესკოს წარმომადგენლებმა მოწვეულ სტუმრებს 2012-2015 წლების საარჩევნო ადმინისტრაციის სტრატეგიული გეგმა და რეგიონულ მედიასთან თანამშრომლობის გეგმის პროექტი გააცნეს; ასევე წარუდგინეს ურთიერთთანამშრომლობის მემორანდუმი, რომელიც ცესკომ ოთხ რეგიონულ მედიაორგანიზაციასთან გააფორმა (ცესკოსთან ერთად დოკუმენტს ხელს აწერენ საქართველოს რეგიონული მედიის და რეგიონულ მაუწყებელთა ასოციაციების, ასევე რეგიონულ რადიოსადგურთა და საქართველოს სატელევიზიო ქსელების წარმომადგენლები).
როგორც კომისიის წარმომადგენლებმა აღნიშნეს, საარჩევნო ადმინისტრაციასა და
მედიასაშუალებებს შორის ინფორმაციის მუდმივად გაცვლა ხელს შეუწყობს ამომრჩეველთა ინფორმირებას საარჩევნო საკითხებზე. ცენტრალური საარჩევნო კომისიის მიზანია, მჭიდრო და პერმანენტული ურთიერთობები დაამყაროს რეგიონულ მედია წარმომადგენლებთან.
