სადაზღვეო ბიზნესი პაციენტს, სადაზღვევო კომპანიასა და სამედიცინო დაწესებულებას შორის თამაშის ახალი წესების შემოღებას მიესალმება. როგორც სააგენტო "ჯი-ეიჩ-ენთან" საუბრისას სადაზღვევო კომპანია "იმედი L"-ის გენერალური დირექტორის მოადგილემ ლაშა ნიკოლაძემ განაცხადა, ახალი საბაზისო წესების შემუშავება "იმედი L"-ისთვის ორმაგად მნიშვნელოვანია.
"ვინაიდან რიგ შემთხვევებში ჩვენ ამ სამმხრივი ურთიერთობის ორ მხარეს წარმოვადგენთ (როგორც სადაზღვევო, ასევე სამედიცინო პროვაიდერი), სადაზღვევო ინდუსტრიის მხრიდან საკითხს იხილავს სადაზღვევო ასოციაცია, რომელშიც ჩვენ აქტიურად ვმონაწილეობთ. უკვე რამდენიმე შეხვედრა განხორციელდა ჯანმრთელობის ახალ მინისტრთანაც და პრემიერ-მინისტრთანაც. საკითხის სირთულიდან გამომდნინარე, დამუშავება ეტაპობრივად მიმდინარეობს. იმედი გვაქვს, მაქსიმალურად იქნება დაცული სამივე მხარის ინტერესები, რათა დაზღვეულთა (და არა მარტო მათ) მიერ გარჩევადი იყოს ხარისხიანი სადაზღვევო პირობების მიღება რეალურ ფასად და საჭიროებისას შესაბამისად შესაძლებელი იყოს ხარისხიანი სამედიცინო სერვისის მიღება. ამასთან, ხელშეკრულებებში გასაწერია ფინანსური ურთიერთობების ძირითადი წესები, რომელიც არანაკლებ მნიშვნელოვანია კომერციული სტრუქტურების ნორმალური საქმიანობისთვის",- განაცხადა "ჯი-ეიჩ-ენთან" საუბრისას ლაშა ნიკოლაძემ.
მისი განმარტებით, კომპანიას იმედი აქვს, რომ შედეგად, გამართული სისტემა ჩამოყალიბდება, სადაც ნაკლები უკმაყოფილო მხარე იქნება.
"და რაც მთავარია, მივიღებთ ხარისხზე ორიენტირებულ სამართლიან სისტემას, როგორც დაზღვევის, ასევე სამედიცინო სერვისის მიწოდების კუთხით, რასაც მხოლოდ მივესალმებით", - განმარტავს ნიკოლაძე.
როგორც ცნობილია, მთავრობა პაციენტს, სადაზღვევო კომპანიასა და სამედიცინო დაწესებულებას შორის ურთიერთობის ახალი თამაშის წესების შემუშავებაზე მუშაობს, რომლის პრეზენტაციასაც ჯანდაცვის მინისტრი მომავალი მთავრობის სხდომაზე გააკეთებს.
პრემიერ-მინისტრმა თამაშის ახალი წესების შესახებ ინფორმაცია დღეს ჯანდაცვის მინისტრისგან მოისმინა.
როგორც ნიკოლოზ გილაურმა აღნიშნა, მნიშვნელოვანია, რომ არსებული პრობლემები აღმოიფხვრას და პაციენტის უფლებები მაქსიმალურად იყოს დაცული.
გილაურმა ჯანდაცვის მინისტრს სთხოვა ისიც, რომ ამ წესების შემუშავებაში აქტიურად იყვნენ ჩართული სადაზღვევო კომპანიები და სამედიცინო კლინიკები.
ჯანდაცვის მინისტრის, ზურაბ ჭიაბერაშვილის განმარტებით, ამ წესების ბაზისური ვარიანტი შემუშავებულია და პროექტი უკვე გაეგზავნა სადაზღვევო კომპანიებისა და სამედიცინო კლინიკების ხელმძღვანელებს.
ჭიაბერაშვილის თქმით, მათგან უკვე მოვიდა სხვადასხვაგვარი შენიშვნები, რომელსაც ჯანდაცვის სამინისტრო აუცილებლად ასახავს ამ წესებში. შემდგომ კიდევ ერთხელ გაივლის ამ ახალ წესებს, როგორც სადაზღვევო, ასევე სამედიცინო დაწესებულებების ხელმძღვანელებთან ერთად და ამის შემდეგ მოხდება მისი პრეზენტაცია და საზოგადოებისთვის გაცნობა.
ჭიაბერაშვილი არ მალავს, რომ ამ მიმართულებით მართლაც დიდი პრობლემებია, რადგანაც სახელმწიფო დაზღვევის პოლისის მქონე ადამიანები ხშირად შესაბამის მომსახურეობას ვერ იღებენ და წარმოიქმნება გარკვეული პრობლემები. პრობლემებია ასევე კერძო დაზღვევის მიმართულებით, რადგან ზოგჯერ პაციენტი სამედიცინო დაწესებულებისგან შესაბამის მომსახურებას ვერ იღებს და უკმაყოფილოა.
