საქართველოს პარლამენტის ფრაქცია ,,ქრისტიან-დემოკრატების" აპარატის უფროსი, ვანის საკრებულოს დეპუტატი დათო ლორთქიფანიძე ვანის მოსახლეობას შეხვდა. ადგილობრივების განცხადებით, მათ ხელისუფლებამ საძოვრები უკანონოდ გაუყიდა და ფაქტიურად მთელი მოსახლეობა, 2000 კომლზე მეტი მამა-პაპისეული საძოვრების გარეშე დარჩა.
ამასთან დაკავშირებით ადგილობრივმა მცხოვრებლებმა ვანის გამგეობის შენობის წინ გამაფრთხილებელი აქცია მოაწყვეს, სადაც ისინი კუთვნილი საძოვრების დაბრუნებას ითხოვდნენ.
ვანის საკრებულოს დეპუტატმა „ქრისტიან-დემოკრატმა" დათო ლორთქიფანიძემ მოსახლეობას პირობა მისცა, რომ დაეხმარება თბილისის სააპელაციო სასამართლოში სარჩელის შეტანაში.
„იმ შემთხვევაში თუკი ხელისუფლება კვლავ გააგრძელებს ხალხთან დაპირისპირებას და მიწების უკანონოდ ჩამორთმევას, მაშინ ჩვენ გამოვთქვამთ მზადყოფნას აღნიშნული საკითხი სტრასბურგის ადამიანის უფლებათა ევროპულ სასამართლომდეც მივიტანოთ" -განაცხადა ლორთქიფანიძემ.
