ყველა საკითხი, რასაც ცალ-ცალკე ვაპროტესტებთ, ერთად გასაპროტესტებელია, - განაცხადა გუდიაშვილის მოედანზე სამოქალაქო სოლიდარობის კამპანიის ფარგლებში გამართულ დასკვნით აქციაზე "ტფილისის ჰამქარის" ხელმძღვანელმა ალეკო ელისაშვილმა.
გუდიაშვილის მოედანზე დღეს ქალაქში გამართული ექვსი აქციის მონაწილეები შეიკრიბნენ. აქციის მონაწილეებს ჰქონდათ ტრანსფარანტები: "ცოდნა გასაყიდი პროდუქტი არ არის", "ძალაუფლება საზოგადოებას", "ავტონომიურობა უნივერსიტეტებს", "თავისუფლება მედიას".
აქცია მუსიკის თანხლებით მიმდინარეობდა. იქ შეკრებილებს მადლობა გადაუხადა "ტფილისის ჰამქარის" ხელმძღვანელმა ალეკო ელისაშვილმა. მისი თქმით, დღევანდელი აქციები იმის ნიშანი იყო, რომ ყველა საკითხი, რასაც ცალ-ცალკე ვაპროტესტებთ, ერთად გასაპროტესტებელია. ალესაშვილმა აღნიშნა, რომ კამპანია დღეს დაიწყო და რეგიონებში გადაინაცვლებს.
"მაგალითად თელავში, სადაც აპირებენ, რომ ერეკლეს სასახლეს დაადგან მეორე სართული და თელაველები ამის საწინააღმდეგოდ ვერაფერს ბედავენ, რადგან ემუქრებიან", - განაცხადა ელისაშვილმა.
გუდიაშვილის მოედანთან დაკავშირებით კი მან განაცხადა, რომ თბილისის მერიისგან მოითხოვს ამ მოედნის კონსერვაციის გეგმის შემუშავებას და საერთაშორისო მონიტორინგს.
"ნუ გვიმალავენ, გვაჩვენონ თუ რას აპირებენ ამ მოედანთან დაკავშირებით", - განაცხადა ელისაშვილმა.
დღეს სამოქალაქო სოლიდარობის აქცია მიმდინარეობს, გაიმართა თბილისის ექვს მოედანზე" სააკაძის მოედანზე - ადამიანის უფლებების დაცვის მოთხოვნით; მარჯანიშვილის მოედანზე - გარემოს დაცვის მოთხოვნით; ავლაბრის მოედანზე - თავისუფალი მედიის მოთხოვნით; ვაკის პარკთან მდებარე მოედანზე - განათლების უფლების დაცვის მოთხოვნით; მრგვალ ბაღში - სამართლიანი არჩევნების მოთხოვნით; თავისუფლების მოედანზე - მოთხოვნით - გაამაგრე გუდიაშვილი - დაიცავი კულტურული მემკვიდრეობა.
აქციის ორგანიზატორები არიან - "მედია კლუბი" და "ტფილისის ჰამქარი", ხოლო თანაორგანიზატორები - საქართველოს ახალგაზრდა იურისტთა ასოციაცია, "საერთაშორისო გამჭვირვალობა - საქართველო, "მწვანე ალტერნატივა", თბილისის სახელმწიფო უნივერსიტეტის სტუდენტები, კამპანია - "ეს შენ გეხება" და სხვები.
