გუდაურში სეზონი გრძელდება. გუდაურის განვითარების ფონდი სრიალის მოყვარულებს მეორე კვირაა სიახლეს სთავაზობს. სათხილამურო სეზონის ბოლომდე, ყოველ შაბათ-კვირას, გუდაურში წამსვლელებს დამატებითი, კომფორტული მიკროავტობუსები მოემსახურება.
გუდაურში წასვლის მსურველებს 07:30 საათზე სასტუმრო "რადისონის" მიმდებარე ტერიტორიაზე რამდენიმე მიკროავტობუსი დახვდებათ. პირველი ტრანსპორტი გუდაურის მიმართულებით, დილის 08:00 გავა. მგზავრობის ღირებულება 6 ლარია (ერთი გზა). მიკროავტობუსები გუდაურიდან საბაგიროების გამორთვის შემდეგ, თბილისის მიმართულებით ნახევარ საათში გავლენ.
გუდაურის განვითარების ფონდში განმარტავენ, რომ ბოლო დღეებში გუდაურში თოვს, ტრადიციულად ღამით მუშავდება ტრასები და სრიალის მოყვარულთ დილიდან მაღალი ხარისხის სასრიალო ტრასები ხვდება.
"გაზაფხულის დადგომასთან ერთად შეიცვალა საბაგიროების მუშაობის გრაფიკიც და ამიერიდან, სეზონის ბოლომდე საბაგიროები 09:00-16:00 მუშაობენ",- განმარტავენ გუდაურის განვითარების ფონდში.
