დღეს, 30 მარტს, 14.00 საათზე, ივანე ჯავახიშვილის სახელობის თბილისის სახელმწიფო უნივერსიტეტში სამეცნიერო კონფერენცია "ფოტოქიმიური სმოგი თბილისში" და ამავე სახელწოდების წიგნის პრეზენტაცია გაიმართება.
სმოგის და ადამიანის ჯანმრთელობაზე მისი ზეგავლენის თაობაზე გამოკვლევები თბილისში 2009-2012 წლებში მიმდინარეობდა. კვლევის შედეგად განისაზღვრა ფოტოქიმიური სმოგის წარმოშობის პირობები, მისი კომპონენტების (ოზონი, აეროზოლები და სხვ.) და ატმოსფეროს სხვა პარამეტრების ადამიანის ჯანმრთელობაზე ზემოქმედების ეფექტები.
"1984-2010 წლების მონაცემებით აღმოჩნდა, რომ მიწისპირა ოზონის მომატებული კონცენტრაცია და მისი თანმდევი ადამიანის ჯანმრთელობისთვის მავნე სმოგის კომპონენტები დაახლოებით 1 700 ადამიანით ზრდის საშუალო წლიურ სიკვდილიანობას თბილისის მოსახლეობაში. ეს შეადგენს ქალაქის მოსახლეობის საშუალო წლიური სიკვდილიანობის 14 %, რაც 3-4-ჯერ მეტია, ვიდრე განვითარებულ ქვეყნებში. ამას გარდა, ბოლო წლების განმავლობაში, გასული საუკუნის ოთხმოციან წლებთან შედარებით, თბილისის მოსახლეობა უფრო მგრძნობიარე გახდა ჰაერის დაბინძურების მიმართ", - აღნიშნულია გამოკვლევაში.
პროექტის ავტორებმა ასევე შეიმუშავეს რეკომენდაციები ქალაქის მოსახლეობაზე სმოგის ნეგატიური ზემოქმედების შესარბილებლად.
პროექტი "ფოტოქიმიური სმოგის საარსებო გარემოზე უარყოფითი ზემოქმედების შესუსტება - ქ.თბილისის ეკოლოგიური მდგომარეობის გაჯანსაღების მნიშვნელოვანი ფაქტორი" თსუ გეოფიზიკის ინსტიტუტში შოთა რუსთაველის სახელობის ეროვნული სამეცნიერო ფონდის დაფინანსებით განახორციელა.
