პარლამენტი, აფხაზეთის ოკუპირებულ ტერიტორიაზე ქართული კულტურული ძეგლების სარესტავრაციო საქმიანობაში ჩართვას მოითხოვს. ამის შესახებ პარლამენტის თავმჯდომარემ დავით ბაქრაძემ პარლამენტის დღევანდელ ბიუროს სხდომაზე განაცხადა.
აფხაზეთის დე-ფაქტო პრეზიდენტის ალექსანდრე ანქვაბის ინიციატივა, ქართული კულტურული ძეგლებისთვის სარესტავრაციო სამუშაოების ჩატარების შესახებ, ბიუროს სხდომაზე ვიცი-სპიკერმა პაატა დავითაიამ გააპროტესტა.
მან ბიუროს მიმართა თხოვნით, აფხაზეთში რუსეთის პრეზიდენტის წარმომადგენლის დანიშვნის საკითხთან ერთად, აღნიშნული საკითხზეც გაამახვილოს ყურადღება. მისი თქმით, საერთაშორისო ორგანიზაციებმა, მათ შორის იუნესკომ, კონტროლი მაინც უნდა განახორციელონ, რათა რესტავრაციის დროს არ წაიშალოს ქართული კვალი.
პარლამენტის თავმჯდომარე დავით ბაქრაძის განცხადებით, თუ მართლა საუბარია ქართული ისტორიული ძეგლების აღდგენაზე, ქართული მხარე ამას 100%-ით დაუჭერს მხარს. თუმცა, მისივე თქმით, არსებობს საფრთხე, რომ სინამდვილეში არის ისტორიის წაშლისა და შეცვლის მცდელობა, რაც დანაშაულია.
პარლამენტის თავმჯდომარემ, საგარეო ურთიერთობათა კომიტეტს მოუწოდა, შეიმუშაოს განცხადება საერთაშორისო ორგანიზაციებისადმი, სადაც ქართული მხარე გამოხატავს სრულ მზადყოფნას, ჩაერთოს აფხაზეთის ოკუპირებულ ტერიტორიაზე ქართული კულტურული ძეგლების სარესტავრაციო საქმიანობაში. განცხადებაში ასევე იქნება მოწოდება, რომ საერთაშორისო ორგანიზაციების წარმომადგენლებმა თავადაც მიიღონ მონაწილეობა აღნიშნულ ღონისძიებებში.
აფხაზეთის საოკუპაციო რეჟიმის ლიდერი ალექსანდრე ანქვაბი ქართული კულტურული ძეგლებისთვის ბედიის, მოქვისა და სხვა, ტაძრებისთვის სარესტავრაციო, სამუშაოების ჩატარების ინიციატივით გამოვიდა.
