ამერიკულმა დელეგაციამ რომელიც დუშანბეში ავღანეთის საკითხებში ეკონომიკური თანამშრომლობის რეგიონალურ კონფერენციას ესწრებოდა ირანის პრეზიდენტის მაჰმუდ აჰმადინეჯადის სიტყვით გამოსვლის დროს პროტესტის ნიშნად დარბაზი დემონსტრაციულად დატოვა.
ეს მას შემდეგ მოხდა, როდესაც ირანის პრეზიდენტმა ავღანეთში ყველა უბედურების სათავედ აშშ და ნატო დაასახელა.
"ავღანელი ხალხი გამუდმებით ხდება საკუთარ სახლებში თავდახსმის ობიექტი. ასეთივე სიტუაციაა პაკისტანში, პალესტინაში და რამდენიმე აფრიკულ ქვეყანაში", _ განაცხადა ირანის პრეზიდენტმა.
მისივე თქმით, "მთელი პრობლემა მდგომარეობს ნატოში და ნატოს პოლიტიკაში, რომელიც ტერორიზმთან ბრძოლის საფარქვეშ შევიდა ავღანეთში, ახლა ასეთივე ლოზუნგით ალყას არტყამს რუსეთსა და ჩინეთს".
ირანელი ლიდერის სიტყვით გამოსვლის შუა ნაწილში ამერიკულმა დელეგაციამ, რომელსაც აშშ-ს სახელმწიფო მდივნის თანაშემწე რობერტ ბლეიკი ხელმძღვანელობდა დარბაზი დემონსტრატიულად დატოვა და იქ მხოლოდ მას შემდეგ დაბრუნდა, როდესაც აჰმადინეჯადმა სიტყვით გამოსვლა დაასრულა.
"ასეთი სიტუაცია მსოფლიოში მანამდე გაგრძელდება, ვიდრე ნატო სწორედ ასეთი არასწორი პოლიტიკის გატარებას გააგრძელებს. ნატო და აშშ უნდა შეიცვალონ. წავიდა ის დრო, როდესაც ისინი თავიანთ პირობებს მსოფლიოს კარნახობდნენ. ისტორიამ არაერთხელ დაამტკიცა, რომ ასეთი პოლიტიკა ძალიან მავნებელია მათთვის ვინს მას ატარებს და ისინი ამის გამო დაისჯებიან", _ განაცხადა ირანის პრეზიდენტმა.
მისივე თქმით, სტაბილიზაცია ავღანეთში მას შემდეგ იქნება შესაძლებელი რაც ისინი - "აშშ და ნატო ამ ქვეყანას დატოვებენ. დარწმუნებულნი ვართ, რომ მათი წასვლით ნარკოტიკებთან დაკავშირებული პრობლემებიც მოგვარდება", - მიიჩნევს აჰმადინეჯადი.