პატრიარქი სტუმრებს საქართველოს მართლმადიდებელი ეკლესიის როლზე და მნიშვნელობაზეც ესაუბრა.

"საქართველოს ეკლესია არის ერთ-ერთი უძველესი ქრისტიანული ეკლესია, რომელიც იყო დაარსებული პირველ საუკუნეში. მეოთხე საუკუნეში ქრისტიანობა უკვე ხდება სახელმწიფოებრივი რელიგია, მეხუთე საუკუნეში უკვე ავტოკეფალური ეკლესია და ამას ჰქონდა ძალიან დიდი მნიშვნელობა, ანუ - ავტოკეფალიას", - განაცხადა პატრიარქმა.

მისი თქმით, საქართველოს ეკლესია, სომხურ ეკლესიასთან ერთადიყო ოაზისი მუსულმანურ სამყაროში.
"საუკუნეების მანძილზე საქართველოს ეკლესია, სომხურ ეკლესიასთან ერთად იყო ქრისტიანული ოაზისი, ამ მუსულმანურ სამყაროში და საქართველოს ეკლესია იყო თავისუფალი და ავტოკეფალური, მეცხრამეტე საუკუნის დასაწყისამდე", - აღნიშნა ილია მეორემ.

კათოლიკოს -პატრიარქმა ყურადღება გაამახვილა საქართველოს ეკლესიის უმძიმეს პერიოდზეც და აღნიშნა, რომ რუსეთის იმპერიის მიერ საქართველოს ეკლესიის ავტოკეფალიის გაუქმების შემდეგაც საქართველოს ეკლესიას არასოდეს შეუწყვეტია ბრძოლა ავტეკეფალიის აღსადგენად.

"რუსეთის იმპერატორის ბრძანებით საქართველოს ავტოკეფალია იყო გაუქმებული და იგი დაუმორჩილეს რუსეთის ეკლესიას. 1811 წლიდან 1917 წლამდე იყო ცხრამეტი ეგზარხოსი, აქედან მხოლოდ პირველი იყო ქართველი, დანარჩენი ყველა იყო რუსი.საქართველოს ეკლესია არასდროს არ ყრიდა ფარ-ხმალს და მუდამ ცდილობდა, რომ აღდგენილი ყოფილიყო საქართველოს ეკლესია, რასაც ჰქონდა ძალიან დიდი მნიშვნელობა, არა მარტო ეკლესიისთვის, არამედ, სახელმწიფოსთვის, ჩვენი კულტურისთვის", - განაცხადა პატრიარქმა.

ილია მეორემ აღნიშნა, რომ 1917 წელს საეკლესიო კრების მიერ ავტოკეფალიის აღდგენის შემდეგ გრძელდება ის ტრადიციები, რომელსაც ტრადიცია პირველ საუკუნეში ჩაეყარა.
შეგახსენებთ, რომ საქართველოს ავტოკეფალიის აღდგენის 95-ე წლისთავი ხვალ, 25 მარტს, აღინიშნება.