საერთაშორისო ენერგეტიკული ორგანიზაცია INOGATE საქართველოში ტექნიკური დახმარების პროექტს განახორციელებს. პროექტის ღირებულება 16.5 მლნ. ევროა და იგი სამ წელზეა გათვლილი.
დარგობრივი ეკონომიკის და ეკონომიკური პოლიტიკის კომიტეტის წევრებმა, გურანდა ჯაბუამ და ზურაბ კიკალეიშვილმა და კომიტეტის აპარატის წევრებმა პროექტზე მომუშავე ექსპერტებთან სამუშაო შეხვედრა გამართეს.
პროექტის მენეჯერმა, კევინ მაკენიმ, დეპუტატებს განსახორციელებელი სამუშაოს ძირითადი პრიორიტეტები და მიმართულებები გააცნო. მისი ინფორმაციით, ტექნიკური დახმარების პროექტი ოთხ მთავარ კომპონენტს მოიცავს და მისი განხორციელებისას გათვალისწინებულია როგორც საკანონმდებლო ბაზის ევროპულ სტანდარტებთან ჰარმონიზაცია, ასევე თემატური ტრენინგ-სემინარები და მარეგულირებელი კომისიების და დისტრიბუტორ კომპანიების ურთიერთობების საკითხები.
"საერთაშორისო ენერგეტიკულ ორგანიზაციასთან შეხვედრაზე სამომავლო ურთიერთობების საკითხები განვიხილეთ და ორივე მხარემ საკანონმდებლო დონეზე თანამშრომლობის მზადყოფნა გამოვთქვით. ჩვენთვის საინტერესოა საერთაშორისო სტანდარტების გაცნობა და მათი საქართველოში დანერგვა", - განაცხადა კიკალეიშვილმა შეხვედრის დასასრულს.
