პოლიტიკური პარტია "სალომე ზურაბიშვილი - საქართველოს გზის" საერთაშორისო მდივანი, თეიმურაზ მურვანიძე, ეხმიანება საქართველოს პარლამენტში ინიცირებულ კანონპროექტს, რომლის მიხედვითაც ახალი უფლებამოსილებები ენიჭება ეროვნულ ბანკს.
მისი განცხადებით, დღეს მოქმედი კანონით, ეროვნულ ბანკს უკვე აქვს საკმაოდ ფართო შესაძლებლობები იმისათვის, რომ კრიმინალური ფული არ იქნეს ჩადებული ბანკებში, თუმცა ახალი ცვლილებებით ეროვნული ბანკი ნებისმიერი ახალი კანონის დამდგენი გახდება, რაც საერთოდ ნონსენსია და ეწინააღმდეგება როოგრც საერთაშორისო სამართალს, ასევე თავისუფალი ბაზრის ფუძემდებლურ პრინციპებს და არის კიდევ ერთი "უკანონო კანონი" რომელიც "ხელისუფლებამ ბიძინა ივანიშვილის პოლიტიკაში შემოსვლის შემდეგ ყოველგვარი საერთაშორისო სამართლის და კონსტიტუციური ნორმების დარღვევით მიიღო".
"ამა წლის 5 იანვარს ჩვენ დავიწყეთ პროექტი "უკანონო კანონების" წინააღმდეგ, რაშიც ჩავრთეთ საერთაშორისო თანამეგობრობაც, მისასალმებელია ასევე მთელი რიგი არასამთავრობო ორგანიზაციების აქტიურობაც ამ მხრივ, თუმცა გვინდა საზოგადოებას მოვუწოდოთ, მეტი ყურადღება მიაქციონ ამ ახალ რეგულაციებს, რომელის განხილვაც პარლამენტში ჯერ არ დაწყებულა", - განაცხადა მურვანიძემ.
მურვანიძე საერთაშორისო თანამეგობრობას მოუწოდებს, გამოხატონ აქტიური პოზიცია ამ ახალი რეგულაციების მიმართ, ხოლო პოლიტიკურ პარტიებს მიმართავს ერთობლივი წინააღმდეგობის გაწევის წინადადებით.
