რეგიონული განვითარებისა და ინფრასტრუქტურის სამინისტრო საზაფხულო დასაქმების პროგრამის ფარგლებში 4000-მდე სტუდენტს დაასაქმებს. დღეს, საქართველოს რეგიონული განვითარებისა და ინფრასტრუქტურის მინისტრი რამაზ ნიკოლაიშვილი საქართველოს ტექნიკური უნივერსიტეტის საავტომობილო გზების, აეროდრომების, ხიდების და გვირაბების მშენებლობის და წყალმომარაგების ფაკულტეტების სტუდენტებს შეხვდა. მინისტრმა სტუდენტებს საქართველოს პრეზიდენტის მიერ ინიცირებული საზაფხულო დასაქმების პროგრამა "Summer Job" გააცნო და ზაფხულში სამუშაოდ სამინისტროსა და მის დაქვემდებარებულ უწყებებში მიიწვია.
პროგრამა "Summer Job" საქართველოს მთელ ტერიტორიაზე ზაფხულის არდადეგების პერიოდში 2012 წლის 20 ივლისს ამოქმედდება და 20 აგვისტომდე გასტანს. სწორედ აღნიშნული პროექტის ფარგლებში სამინისტრო ზაფხულის განმავლობაში 4000-მდე სტუდენტის დასაქმებას გეგმავს, რომელთა შორის საუკეთესოებს სამინისტროსა და მის საქვეუწყებო დაწესებულებებში მუდმივი სამსახურის პერსპექტივა გაუჩნდებათ.
რეგიონული განვითარებისა და ინფრასტრუქტურის სამინისტრო ტექნიკური უნივერსიტეტის შესაბამისი ფაკულტეტების სტუდენტებზე სისტემატურად ზრუნავს. სამინისტრომ, მსოფლიო ბანკის დაფინანსებით გაარემონტა ტექნიკური უნივერსიტეტის საავტომობილო გზების, აეროდრომების, ხიდების და გვირაბების მშენებლობის კათედრა, გადასცა სასწავლო ინვენტარი და ბეტონის და ასფალტის ხარისხის განმსაზღვრელი თანამედროვე სტანდარტების ლაბორატორიები და პროგრამები.
