"ჩვენ, იძულებით გადაადგილებულ პირთა, "დევნილთა სამოქალაქო მოძრაობა", ჩამოყალიბების დღიდან აქტიურად ვთანამშრომლობდით "სახალხო კრებასთან", რადგან ჩვენი აზრით, სწორედ საზოგადოების წარმომადგენელთა და პოლიტიკოსთა ეროვნული იდეოლოგიის და დემოკრატიული ფასეულობების მატარებელი, ზეპარტიული ერთობა მოახერხებს ქვეყნის კრიტიკული რეალობის შეცვლას, რომელიც შექმნა მმართველმა ავტოკრატულმა რეჟიმმა საკუთარი ანტისახელმწიფოებრივი პოლიტიკით.
ჩვენმა მოძრაობამ აქტიური მონაწილეობა მიიღო 26 მაისის აქციებში. თითოეული დევნილი, ამ აქციებზე საკუთარმა პროტესტმა და "სახალხო კრებაში" გაერთიანებული ადამიანებისადმი რწმენამ მოიყვანა, რწმენამ იმისა, რომ სწორედ ეს ადამიანები არიან დღეს ის ლიდერები, რომლებმაც საკუთარი ცხოვრებითა და მოღვაწეობით დაუმტკიცეს მთელ საზოგადოებას, რომ ხალხის ხარჯზე არ გაურიგდებიან დამნაშავე რეჟიმს", - აღნიშნულია განცხადებაში.

განცხადებაში ნათქვამი, რომ ყოველივე ამის საფუძველზე, "დევნილთა სამოქალაქო მოძრაობა" უერთდება "სახალხო კრებას".

"ჩვენთვის დიდი პატივია "სახალხო კრებაში" მყოფ სახელოვან ადამიანებთან ერთად ბრძოლა ქვეყნის გადასარჩენად. მინდა თხოვნით მივმართო ყველა დევნილს, მთელ მოსახლეობას, არასამთავრობო და პოლიტიკურ ორგანიზაციებს, გავერთიანდეთ და ერთიანი ფრონტით დავამარცხოთ არსებული რეჟიმი. ჩვენ ვიცით, რომ დევნილები არსებულ ხელისუფლებას მხოლოდ საარჩევნო რესურსად სჭირდება. მათი პრაქტიკულად ყველა დაპირება, ყოველთვის წინასაარჩევნო დაპირებად დარჩა. მეტიც, პარლამენტის უმაღლესი ტრიბუნიდან ქვეყნის პირველმა პირმა საერთოდ არ ახსენა კონფლიქტების მოგვარების საკითხი, ჩვენი ქვეყნისთვის უპირველეს პრიორიტეტსა და ჩვენთვის მტკივნეულ საკითხზე საუბარი არ ყოფილა არც აშშ-სა და საქართველოს პირველი პირების შეხვედრაზე. სრული პასუხისმგებლობით ვაცხადებთ, რომ არსებული ხელისუფლების გაუაზრებელი პოლიტიკა ყოველდღიურად გვიკარგავს ჩვენს მამულში დაბრუნების პერსპექტივას", - აღნიშნავენ ისინი.

"დევნილთა სამოქალაქო მოძრაობა" დარწმუნებულნი არიან, რომ სწორედ "სახალხო კრებაა" ის ძალა, რომელიც შეძლებს ქვეყნისთვის მომავალი დემოკრატიული განვითარების პერსპექტივის დაბრუნებას და ქვეყნის სათავეში ისეთი ძალის მოსვლის ხელშეწყობას, რომელიც უზრუნველყოფს ქართველ, აფხაზ და ოს ხალხს შორის ყოველგვარი შიშის და წინაპირობების გარეშე ჩატეხილი ხიდის აღდგენას და ერთიან, ღირსეულ გარემოში მშვიდოებიან თანაცხოვრებას.