საქართველოს საგარეო საქმეთა სამინისტრო რუსეთის საგარეუ უწყების ხელმძღვანელის სერგეი ლავროვის განცხადება ეხმიანება, რომლის თანახმად რუსეთი სავიზო რეჟიმის გაუქმებისათვის ოკუპირებული ტერიტორიების შესახებ კანონის გაუქმებას ითხოვს.
საქართველოს საგარეო უწყების განცხადებაში აღნიშნულია, რომ როდესაც საქართველომ მიიღო გადაწყვეტილება რუსეთის მოქალაქეებისთვის სავიზო რეჟიმის გაუქმებასთან დაკავშირებით, საქართველოს არანირი წინაპირობა არ წამოუყენებია - არც რუსეთის ჯარების გაყვანის, არც ცეცხლის შეწყვეტის შესახებ 12 აგვიტოს შეთანხმების განხორციელების და არც საქართველოსთან მიმართებაში ძალის არგამოყენების შესახებ.
"საქართველოს გადაწყვეტილება სავიზო რეჟიმის გაუქმებასთან დაკავშირებით წარმოადგენს პრაგმატულ ქმედებას, რომლის მიზანია ხელი შეუწყოს ადამიანებს შორის ურთიერთობებს რუსეთის მხრიდან გაჟღერებული ყალბი სიტყვების ფონზე, რომლებიც შეეხებოდა „ქართველი ხალხის მიმართ სიყვარულს", - ნათქვამია საქართველოს საგერეო საქმეთა სამინისტროს განცხადებაში და აღნიშნულია, რომ რუსეთი ცდილობს უვიზო რეჟიმის საკითხის პოლიტიზირებას.
"ჩვენ კარგად გვესმის, თუ რატომ ცდილობს რუსეთი უვიზო რეჟიმის საკითხის პოლიტიზირებას - მოსკოვს არანაირი არგუმენტი არ გააჩნია იმასთან დაკავშირებით, თუ რატომ ვერ უნდა შედიოდნენ საქართველოს მოქალაქეები უვიზოდ რუსეთის ტერიტორიაზე", - ნათქვამია განცხადებაში და აღნიშულია, რომ რუსეთის არგუმენტები, რომ რუსეთს უვიზო რეჟიმი აქვს მხოლოდ დსთ-ს წევრ სახელმწიფოებთან და დსთ-დან საქართველოს გასვლამ შეუძლებელი გახადა ორ ქვეყანას შორის უვიზო რეჟიმის შემოღება, უსაფუძვულოა. ასევე "არგუმენტი", რომლის თანახმადაც რუსეთი სჭირდება ორმხრივი შეთანხმება ვიზების გაუქმებასთან დაკავშირებით, "ამგვარი "არგუმენტების" უსაფუძვლობა შეიძლება ადვილად გადამოწმდეს შესაბამის ვებგვერდებზე".
"რაც შეეხება ოკუპირებული ტერიტორიების შესახებ კანონს, კიდევ ერთხელ აღვნიშნავთ, რომ ეს კანონი წარმოადგენს საქართველოს ორი რეგიონის - აფხაზეთისა და ცხინვალის რეგიონის/სამხრეთ ოსეთი ოკუპაციის შედეგს. როგორც კი განხორციელდება ამ რეგიონების დე-ოკუპაცია, ოკუპირებული ტერიტორიების შესახებ კანონი დაკარგავს თავის მნიშვნელობას და ავტომატურად გაუქმდება", - ნათქვამია საქართველოს საგარეო უწყების განცხადებაში.
2012 წლის 14 მარტს, რუსეთის საგარეო საქმეთა მინისტრმა კიდევ ერთხელ დაადასტურა, რომ მოსკოვი არ გეგმავს შემხვედრი გადაწყვეტილებით უპასუხოს საქართველოს პრეზიდენტის ინიციატივას რუსეთის ფედერაციის მოქალაქეებისთვის სავიზო რეჟიმის ცალმხრივად გაუქმებასთან დაკავშირებით. ლავროვმა სავიზო რეჟიმის გაუქმების წინაპირობად საქართველოს მიერ ოკუპირებული ტერიტორიების შესახებ კანონის გაუქმება დაასახელა.