საპარლამენტო უმცირესობის წევრის, "ქრისტიან-დემოკრატი" ვიცე-სპიკერის ლევან ვეფხვაძის შეფასებით, საქართველოში განათლების სოციალური პოლიტიკის არარსებობა სერიოზული პრობლემაა.
როგორც ვეფხვაძემ პარლამენტში პრეზიდენტის წლიური ანგარიშით გამოსვლის შემდეგ გამართულ დებატებზე აღნიშნა, სოციალურ პოლიტიკაში იგულისხმება განათლების ხელმისაწვდომობა ბავშვებისთვის.
"2003 წელს არსებული 3100 სკოლიდან დღეს 2100-მდეა დარჩენილი, რის შედეგადაც 350-ზე მეტი სოფელი სკოლის გარეშე დარჩა. ამ სოფლებში ბავშვებს უთხრეს, ფეხით იარონ მეზობელ სოფელში, დაშორება კი 10 კილომეტრს აღწევს", - აღნიშნა ვეფხვაძემ.
ოპოზიციონერი ვიცე-სპიკერის თქმით, მეორე საკითხია სახელმძღვანელოები, კერძოდ კი "ქრისტიან-დემოკრატების" შეთავაზება, რომ 100 ათას ქულამდე, ასევე ოჯახებისთვის, სადაც სამი და მეტი ბავშვი ერთდროულად დადის სკოლაში, სახელმძღვანელოები უფასოდ გადაეცათ, უშედეგო აღმოჩნდა.
მან ყურადღება სერთიფიცირებული პედაგოგებისთვის 75-ლარიან დანამატზე გაამახვილა და აღნიშნა, რომ ხელისუფლების დაპირება სადღაც გაქრა.
"სად გაქრა დაპირება პედაგოგებისთვის მეცამეტე ხელფასზე, რომელიც ერთხელ, 2008 წელს, პედაგოგებმა აიღეს, მას შემდეგ კი თვალით აღარავის უნახავს? იქნებ იმიტომ, რომ 2008 წელი საარჩევნო წელი იყო?" - მიმართა პრეზიდენტს ვეფხვაძემ.
რაც შეეხება სკოლამდელ აღზრდას, დეპუტატის თქმით, პედაგოგებს სტატუსიც კი არ აქვთ, რაც საქართველოს კონსტიტუციის დარღვევა.
"კონსტიტუციის 35-ე მუხლში პირდაპირ წერია, რომ სკოლამდელ აღზრდას უზრუნველყოფს სახელმწიფო. სახელმწიფომ კი 2005 წელს გადააბარა თვითმმართველობებს და მოიხსნა პასუხისმგებლობა. ანუ გვაქვს უსტატუსო აღმზრდელი და ისევ დაჩაგრული საშუალო ფენა, რომელსაც სამსახურის გამო ბავშვი წესით მიჰყავს ხოლმე ბაღში", - აცხადებს დეპუტატი.
