"ხელისუფლების ნოუ-ჰაუა - ძალიან კმაყოფილი ცოტა მდიდარი და ცოტათი კმაყოფილი ბევრი ღარიბი", - ამის შესახებ პარლამენტში გამართულ დებატებზე უმცირესობის ლიდერმა გიორგი თარგმაძემ განაცხადა.
მისი თქმით, ხელისუფლების "დამსახურებაა", რომ საზოგადოებაში არ მოიძებნება ადგილი საშუალო ფენისათვის.
"ძალიან კმაყოფილი ცოტა მდიდარი და ცოტათი კმაყოფილი ბევრი ღარიბი - ეს არ არის თქვენ მიერ აღმოჩენილი ნოუ-ჰაუ, არამედ ხალხის საარჩევნი მანიპულაციის კარგად გააზრებული პოლიტტექნოლოგიური სქემა: რადგან შიში, სიღარიბე და პროპაგანდა გადაიქცა თქვენი ხელისუფლების მთავარ პოლიტტექნოლოგიურ იარაღად. სწორედ ამ სამი კომპონენტის მეშვეობით ებრძვით საშუალო ფენას, ყველაზე აქტიურ, მოტივირებულ და, შესაბამისად, ნებისმიერი რეჟიმისთვის ყველაზე "საშიშ" სოციალურ ჯგუფს", - აღნიშნა თარგამაძემ.
მისი თქმით, ხელისუფლების სქემით ქვეყანაში უნდა იყვნენ ერთი მუჭა მონოპოლისტი მილიარდერები და ღარიბ-ღატაკთა უზარმაზარი მასა, რომელსაც დემოკრატიულ ღირებულებებზე საფიქრალად არ სცხელა და მცირე დახმარებითაც კმაყოფილდება, რადგან ყოველდღიური გადარჩენისთვის იბრძვის.
"თქვენი ყველა გადაწყვეტილება მიმართულია საშუალო ფენის წინააღმდეგ: ნაციონალების სატარიფო კომუნალური პოლიტიკა საშუალო ფენისა და მისი ძირითადი მკვებავის - მცირე და საშუალო ბიზნესის, საჯარო და კერძო სექტორში დასაქმებული ადამიანების ბოლომდე გასაპარსადაა მიმართული. საქართველოში ქართველებმა ფული არ უნდა აგროვონ, სხვამ რამდენიც უნდა. თქვენ გამოუცხადეთ ბრძოლა საშუალო ფენას და არცაა გასაკვირი, რომ მთლიანი ფინანსური ბრუნვის 85% მსხვილ ბიზნესზე მოდის, მაშინ, როცა ძირითადი დამსაქმებელი მცირე და საშუალო ბიზნესია", - აღნიშნა დეპუტატმა და დასძინა, რომ დასაქმებულთა რეალური რაოდენობა მცირდება.
მისი თქმით, იმის ნაცვლად, რომ უმუშევართა სოციალურ დაცვაზე იზრუნოს მთავრობამ, პირიქით ხდება და შეცდომის პროვოცირებაზე დაგეშილი საგადასახადო აგენტებით კიდევ უფრო მეტ პრობლემას უქმნიან მთავარ დამსაქმებელს - მცირე და საშუალო ბიზნესს.
"ქრისტიან-დემოკრატები" კიდევ ერთხელ გთავაზობთ პროგრესული საგადასახადო სისტემის შემოღებას, რომელიც მეტ სოციალურ სოლიდარობას უზრუნველყოფს. კიდევ ერთხელ ხაზგასმით მინდა ვთქვა, რომ ჩვენი პრინციპული პოზიციაა - არ დავუშვათ გადასახადების ზრდა. შესაბამისად, საშემოსავლო გადასახადის პროპორციული განაკვეთის მაქსიმალური ოდენობა კვლავ ოცი პროცენტი უნდა იყოს, ხოლო დაბეგვრის მინიმალური დონე 10 პროცენტზე დაფიქსირდეს", - აცხადებს თარგამაძე.
