საერთო სამაგისტრო გამოცდაში მოპოვებული ქულების გამოყენება მხოლოდ საერთო სამაგისტრო გამოცდის ჩაბარების წელს იქნება შესაძლებელი.
აღნიშნულთან დაკავშირებით პარლამენტმა "უმაღლესი განათლების შესახებ" კანონში ცვლილებები დღეს მესამე მოსმენით დაამტკიცა.
მიღებული გადაწყვეტილების თანახმად, მაგისტრანტობის კანდიდატი ვერ შეინახავს მიღებულ შედეგებს სამი წლის განმავლობაში სახელმწიფო სასწავლო სამაგისტრო გრანტის მიღების მიზნით.
ასევე, ერთიან ეროვნულ გამოცდებსა და სამაგისტრო გამოცდებთან დაკავშირებით განათლების სამინისტროს მიერ მიღებული გადაწყვეტილებების სასამართლოში გასაჩივრება მათ მოქმედებას ვერ შეაჩერებს.
აღსანიშნავია, რომ კანონმდებლობით განათლებისა და მეცნიერების სამინისტრო უფლებამოსილია, ერთიან ეროვნულ და სამაგისტრო გამოცდებთან დაკავშირებით დაადგინოს საქართველოს ზოგადი ადმინისტრაციული კოდექსით გათვალისწინებულისგან განსხვავებული ადმინისტრაციული საჩივრის წარდგენისა და განხილვის ვადები.
დღეს დამტკიცებული ცვლილბების თანახმად კი, სამინისტროს შეეძლება დაადგინოს როგორც საჩივრის განსხვავებული წარდგენისა და განხილვის ვადები, ასევე განსხვავებული წესიც.
კანონში გაკეთდა ჩანაწერი, რომ ერთიან ეროვნულ და საერთო სამაგისტრო გამოცდასთან დაკავშირებული განათლებისა და მეცნიერების სამინისტროს გადაწყვეტილებები საჩივრდება სასამართლოში, თუმცა მათი გასაჩივრება სადავო აქტების მოქმედების შეჩერებას არ გამოიწვევს.