ისრაელის საგარეო საქმეთა სამინისტროს მაღალჩინოსნები ძალიან გაკვირვებულნი იყვნენ ოფიციალური თბილისიდან მომავალი ინფორმაციით, იმის შესახებ, რომ თითქოს "უკვე დიდი ხანია" მიმდინარეობს მოლაპარაკებები იერუსალიმის ჯვრის მონასტრის საქართველოსათვის გადაცემის თაობაზე. ამას გარდა, ამის შესახებ რამე არც ისრაელის პრემიერ-მინისტრის კანცელარიაში იციან... ინფორმაციას ამის შესახებ ებრაული სააგენტო "იზრუსი" ავრცელებს.
სააგენტოს მიერ გავრცელებული ინფორმაციით, "ებრაელმა დიპლომატებმა გაკვირვებით მიიღეს ოფიციალური თბილისიდან მომავალი ინფორმაცია იმის შესახებ, რომ მიმდინარეობს ორმხრივი მოლაპარაკებები ჯერ კიდევ XI ასწლეულში იერუსალიმში აშენებული ჯვრის მონასტრის საქართველოსათვის "დაბრუნების" თაობაზე", - წერს სააგენტო.
"ჩვენთან ეს ახალი ამბავია. მსგავსი არაფერი გაგვიგია", _ განაცხადა სააგენტოსთან საუბარში ისრაელის საგარეო საქმეთა სამინისტროს პრესმდივანმა იგალ პალმორმა. სააგენტოსავე ინფორმაციით, ანალოგიური რეაგირება ჰქონდათ ისრაელის საგარეო საქმეთა სამინისტროს ევრაზიისა და ცენტრალური ევროპის დეპარტამენტში, როდესაც სააგენტო მათ ამ კითხვით მიმართა.
ასევე არაფერი გაუგია იმის შესახებ, რომ ვინმე დედაქალაქის ცენტრში მდებარე რელიგიური ობიექტის საქართველოსათვის გადაცემას აპირებს ისრაელის საგარეო საქმეთა სამინისტროს რელიციის საქმეთა განყოფილების ხელმძღვანელს შმუელ ბენ-შმუელს", _ წერს სააგენტო.
მათივე ინფორმაციით, სწორედ ასეთი კომენტარი გააკეთეს მათ საქართველოს საგარეო საქმეთა მინისტრის ნინო კალანდაძის მიერ 27 თებერვალს გაკეთებულ განცხადებაზე. საქართველოს საგარეო საქმეთა მინისტრის მოადგილის ნინო კალანდაძის განცხადებით, ისრაელში მდებარე ჯვრის მონასტრის საქართველოსთვის დაბრუნების საკითხთან დაკავშირებით ქართული მხარე იმედოვნებს, რომ მეორე მხრიდანაც აქტიური გამოხმაურება მოჰყვება. როგორც კალანდაძემ საგარეო საქმეთა სამინისტროში გამართულ ტრადიციულ ბრიფინგზე განაცხადა, რთულია იმის თქმა თუ რა ეტაპზე იმყოფება ამ დროისთვის მოლაპარაკებები.
"რთული საკითხია რა ეტაპზე იმყოფება მოლაპარაკება. მოლაპარაკების პროცესი მოიცავს ორივე მხარის მონაწილეობას და ორივე მხარეს უნდა შეიქმნას სამუშაო ჯგუფი. ორივე მხარე და სამუშაო ჯგუფი კონპლექტდება არა მხოლოდ საგარეო საქმეთა სამინისტროს წარმომადგენლობით, არამედ სწორედ დარგობრივი და მეცნიური წარმომადგენლობით. ჩვენ იმედი გვაქვს, რომ მას შემდეგ რაც პრეზიდენტის მიერ გაცხადებული იქნა ეს ინიციატივა კიდევ უფრო გავააქტიურებთ ამ საქმიანობას და იმედი გვაქვს, რომ სწორედ მეორე მხრიდანაც აქტიურ გამოხმაურებას შევხვდებით. ეს საკითხი ჩვენთვის ერთ-ერთი ყველაზე პრიორიტეტულია", - განაცხადა კალანდაძემ.
ამას გარდა, იმის შესახებ, რომ ისრაელის ჯვრის მონასტრის საქართველოსათვის დაბრუნებაზე მოლაპარაკებები მიმდინარეობს განცხადება საქართველოს პრეზიდენტმა მიხეილ სააკაშვილმაც გააკეთა.
შეგახსნებთ, რომ იერუსალიმში ჯვრის მონასტერი ქართველმა მოღვაწემ გიორგი-პროხორე შავთელმა საქართველოს სამეფო კარის მხარდაჭერითა და დახმარებით XI საუკუნის 30-50-იან წლებში დააარსა. გადმოცემით მონასტრის ადგილას მოჭრილი ხისგან გააკეთეს ჯვარი, რომელზეც თითქოს ქრისტე აცვეს. ჯვრის მონასტერი პალესტინის ქართულ სავანეთა აღიარებული ცენტრი გახდა. 1071 წელს იერუსალიმის აღებისას, მონასტერი დაარბიეს და ნაწილობრივ დაანგრიეს თურქ-სელჩუკებმა. XII საუკუნის დამდეგს მეფე დავით IV აღმაშენებლის მხარდაჭერით აღადგინეს, განაახლეს და მოხატეს.
ეგვიპტის სულთნის სალადინის (სალაჰ ალ-დინი) მიერ იერუსალიმის დაპყრობის (1187) შემდეგ მონასტერი კვლავ მძიმე მდგომარეობაში აღმოჩნდა. თამარის მეფობის ხანაში მას არაერთხელ გაუწიეს დახმარება, ხოლო 1192 წელს საგანგებო ელჩობა მიავლინეს მისი მატერიალური და უფლებრივი მდგომარეობის გასაუმჯობესებლად.
1272 წელს მონასტერი ჩამოერთვათ ქართველებს და მეჩეთად გადაკეთდა. 1305 მეფე დავით VIII-ის მცდელობით იგი ქართველებს დაუბრუნდა. მონასტერი არადგინეს და განაახლეს. 1400 წელს ჯვრის მონასტერი კვლავ დაარბიეს. XV საუკუნეში მონასტერს მატერიალური დახმარება გაუწიეს ზაზა ფანასკერტელ-ციციშვილმა და მზეჭაბუკ ათაბაგმა. მონასტერში აღმშენებლობითი საქმიანობა გააჩაღა სერაპიონ კუმურდოელმა, 1516-იდან, მას შემდეგ, რაც პალესტინა ოსმალებმა დაიკავეს, მონასტერს ნაწილობრივ შეეკვეცა უფლებები.
XVII საუკუნეში ქართველთა ყურადღება ჯვრის მონასტრისადმი გაიზარდა. 40-იან წლებში აქ დიდი აღდგენითი სამუშაოები ჩაატარა ნიკოლოზ ჩოლოყაშვილმა (ნიკიფორე ირბახი). სამეგრელოს მთავარის ლევან II დადიანის მატერიალური დახმარებით შეაკეთა მთავარი ტაძარი, მოახატვინა კედლები, გუმბათი და სხვა. 1684 წელს დავალიანებული მონასტერი დაიხსნა ქართლის მეფე გიორგი XI-მ. ქართველთა გავლენა თანდათან შესუსტდა და ბოლოს, XVII საუკუნის დასასრულს ჯვრის მონასტერი სხვა ქართულ სავანეებთან ერთად ბერძენთა ხელში გადავიდა და იერუსალიმის საპატრიარქოს დაექვემდებარა. 1855 აქ ბერძნული სასულიერო სემინარია გაიხსნა (მოქმედებდა 1908-მდე). ბერძნული სამღვდელოება ჩქმალავდა ჯვრის მონასტრის ქართულ კულტურასთან კავშირსა და ქართველთა მოღვაწეობის ფაქტებს, ფრესკები საგანგებოდ შეათეთრეს. 1948-1958 წლებში მონასტრის ტერიტორიაზე ისრაელის ჯარის ნაწილი იდგა.
