კონტროლის პალატის საქმიანობის აუდიტის განმახორციელებელ საპარლამენტო კომისიას უფლებამოსილების ვადა სამი თვით გაუგრძელდება. ვადის გაგრძელების თხოვნით კომისიამ დღეს ბიუროს მიმართა, რაზეც თანხმბობა მიიღეს, თუმცა რეგლამენტის თანახმად, გადაწყვეტილებას პარლამენტის პლენარულ სხდომაზე კენჭს ხვალ უყრიან.
დროებითი საპარლამენტო კომისიის თავმჯდომარის, ზურაბ ბუცხრიკიძის განმარტებით, კონტროლის პალატის მიერ ამ ეტაპზე მიწოდებული დოკუმენტაციის მოცულობა შეადგენს დაახლოებით 2 000 გვერდს, რომლის დამუშავებაც მიმდინარეობს.
მისი თქმითვე, ზოგიერთი მასალა საჭიროებს დაზუსტებას და დამატებით დოკუმენტაციის მიწოდებას რაც დროს მოითხოვს.
როგორც ცნობილია, „კონტროლის პალატის 2011 წლის საფინანსო-ეკონომიკური საქმიანობის აუდიტის განმახორციელებელი პარლამენტის დროებითი კომისია" გასული წლის 6 დეკემბერს შეიქმნა.
აუდიტის პროგრამის მიხედვით, კომისიამ ამ ეტაპზე მოითხოვა პალატის ბიუჯეტის პროექტი, წლის განმავლობაში განხორციელებული ცვლილებები, ინფორმაცია ფინანსური მდგომარეობის შესახებ, კვარტალური ანგარიშები, გაფორმებული ხელშეკრულებები და სხვა მნიშვნელოვანი დოკუმენტაცია, რომელიც დაკავშირებულია აუდიტთან.
