ქალაქში მოძრაობის განტვირთვის მიზნით, თბილისის მერიამ მტკვრის მარჯვენა სანაპიროზე ახალი, გრანდიოზული პროექტის განხორციელება დაიწყო. პროექტის მიხედვით მარჯვენა სანაპიროს მთელ სიგრძეზე ხუთ ადგილას პანდუსები, ხიდები, გვირაბები და ესტაკადები აშენდება. წლის განმავლობაში 1000-მდე ადამიანი დასაქმდება და მშენებლობა 2012 წლის შემოდგომაზე დასრულდება.
პროექტის ფარგლებში, ბარათაშვილის ხიდთან ესტაკადის მშენებლობა უკვე დაიწყო. ავლაბრიდან მოძრავი სატრანსპორტო საშუალებები, რომლებიც მოძრაობენ მარჯვენა სანაპიროზე, დიღმის მიმართულებით, ახალი ესტაკადით ისარგებლებენ. იუსტიციის სახლთან გაუქმდება არსებული შუქნიშანი და სატრანსპორტო საშუალებები უწვეტ რეჟიმში შეძლებენ გადაადგილებას. მარჯვენა სანაპიროზე დიღმის მხრიდან მოძრავი ნაკადი, რომელიც იუსტიციის სახლის მიმართულებით იმოძრავებს, ავა ბარათაშვილის ხიდზე არსებულ პანდუსზე და მარცხნივ მოხვევით ახალი ესტაკადით ისარგებლებს. მარჯვენა სანაპიროზე ორთაჭალის მხრიდან მოძრავ ტრანსპორტს აღარ ექნება მარცხნივ მოხვევით ბარათაშვილის ხიდზე არსებულ პანდუსზე ასვლის უფლება და ისინი მშრალი ხიდიდან დატრიალდებიან სანაპიროზე. ბარათაშვილის ხიდთან მიმდინარე სამუშაო თბილისის კეთილმოწყობისა და ტრანსპორტის საქალაქო სამსახურების უფროსებმა დაათვალიერეს.
