სამოქალაქო მოძრაობა "ქართულ-აფხაზური და ქართულ-ოსური სახლი"-ს ლიდერი ნესტან კირთაძე განაგრძობს სამუშაო ვიზიტს ევროპაში. კირთაძე ამჟამად აწარმოებს შეხვედრებსა და მოლაპარაკებებს ბიუსელში და ლოვენში, სადაც შეხვედრები აქვს როგორც ბრიუსელის ოფიიალურ წრეებთან, ისე ქართული ემიგრაიის წარმომადგენლებთან .
ნესტან კირთაძე ბრიუსელიდან სპეციალურ განცხადებას ავრცელებს, რომელსაც უცვლელად გთავაზობთ:
"სამოქალაქო მოძრაობა "ქართულ-აფხაზური და ქართულ-ოსური სახლი" შეშფოთებას გამოთქვამს აფხაზეთის ლიდერზე, ბატონ ალექსანდრე ანქვაბზე თავდასხმის ფაქტის გამო და აცხადებს, რომ ყოველი აფხაზის სიცოცხლე, როგორც ჩვენი ნათესავი ერის წარმომადგენლისა, არის უაღრესად ძვირფასი ჩვენთვის, მითუმეტეს შემაშფოთებელია სიცოცხლის ხელყოფის მცდელობა აფხაზეთის პოლიტიკურ ლიდერზე.
გამოვთქვამთ იმედს, რომ ეს მძიმე ფაქტი გამოძიებული იქნება და მსგავსი ტიპის სახიფათო პროვოკაციებით ვერავითარი დაინტერესებული ძალა ვერ შეძლებს გააღრმავოს უნდობლობა და კონფრონტაცია ქართველ და აფხაზ ხალხს შორის.
პირიქით, ქართულ საჯარო სივრცეში გაჩნდა სამოქალაქო მოძრაობა - "ქართულ-აფხაზური და ქართულ-ოსური სახლი", რომელიც, ქვეყნის შიგნით და გარეთ, მთელი მსოფლიოს გასაგონად აცხადებს, რომ ჩვენ უნდა მოვამზადოთ საფუძვლები ურთიერთნდობის და თანამშრომლობის აღსადგენად. ეს რთული პროცესია, მაგრამ არა შეუძლებელი.
ჩვენ კიდევ ერთხელ ვადასტურებთ ჩვენს პატივისცემას და თბილ ადამიანურ ემოციებს აფხაზი ხალხის მიმართ და მშვიდობასა და კეთილდღეობას ვუსურვებთ თითოეულ აფხაზ ოჯახს, აფხაზეთის პოლიტიკურ ლიდერს, ბატონ ალექსანდრე ანქვაბს".
