საერთაშორისო საფინანსო კორპორაცია (IFC), მსოფლიო ბანკის ჯგუფის წევრი, და შემოსავლების სამსახური ქართველ მეწარმეებს და კომპანიებს იმპორტ-ექსპორტის გამარტივებული პროცედურებით სარგებლობაში ეხმარებიან, რითაც საგარეო ვაჭრობის განვითარებას უწყობენ ხელს.
IFC-ის საგადასახადო პროექტმა საქართველოში და შემოსავლების სამსახურმა ამ კვირაში საბაჟო საკითხებთან დაკავშირებით ბათუმში ორდღიანი ვორკშოპი მოაწყვეს. შეხვედრის მიზანია ხელი შეუწყონ იმპორტ-ექსპორტში ჩართულ კომპანიებს, საკონსულტაციო ფირმებსა და ბროკერებს, ისარგებლონ საგარეო ვაჭრობის რეგულირების სფეროში და გაფორმების ეკონომიკურ ზონებში ბოლო ხანს განხორციელებული რეფორმებით. ვორკშოპის ფარგლებში ადლიისა და ფოთის გაფორმების ეკონომიკური ზონებისა და სარფის პორტალის დათვალიერებაც არის დაგეგმილი, სადაც თურქეთთან ერთად საზღვრის ერთობლივი მართვა ხორციელდება.
“საგადასახადო და საბაჟო სფეროებში განხორციელებულმა ძირეულმა რეფორმებმა მნიშვნელოვნად გააადვილა პროცედურები იმპორტიორებისა და ექსპორტიორებისათვის, დაზოგა მათი დრო და მატერიალური რესურსები. გაუმჯობესებული ინფრასტრუქტურა და ახალი ელექტრონული სერვისები, რომლებსაც ბიზნეს-კომპანიებს ვთავაზობთ, მომხმარებელზეა ორიენტირებული. ბათუმის ვორკშოპის მიზანია კომპანიებს ეფექტურად მივაწოდოთ ინფორმაცია განხორციელებული რეფორმების შესახებ”- განაცხადა შემოსავლების სამსახურის უფროსმა ჯაბა ებანოიძემ.
`IFC განაგრძობს საქართველოს მთავრობასთან მუშაობას ბიზნესის რეგულირების პროცედურების გაუმჯობესების მიმართულებით. ამ საქმიანობის ერთ-ერთი მნიშვნელოვანი კომპონენტი კი მეწარმეების ინფორმირებაა მათი უფლებების, მოვალეობებისა და საკანონმდებლო ცვლილებების შესახებ.” - აღნიშნა IFC-ის წარმომადგენელმა კავკასიაში თომას ლუბეკმა.
IFC -ის საგადასახადო პროექტი საქართველოში ავსტრიისა და ლუქსემბურგის მთავრობების და ნიდერლანდების საგარეო საქმეთა სამინისტროს ფინანსური მხარდაჭერით ხორციელდება.
საქართველო IFC -ის წევრი 1995 წელს გახდა. IFC -ის ინვესტიციებმა საქართველოში თითქმის 561 მილიონი აშშ დოლარი შეადგინა სხვადასხვა სექტორის 40 პროექტში. გარდა ამისა, IFC თავისი საკონსულტაციო პროექტის ფარგლებში მუშაობს საქართველოს საგადასახადო სისტემის რეფორმირების მიმართულებით, რაც მცირე ბიზნესის განვითარებას შეუწყობს ხელს. IFC საკონსულტაციო პროექტების მეშვეობით კომპანიებს სურსათის უვნებლობის სტანდარტების ამაღლებაში ეხმარება და ასევე, მუშაობს ბანკებთან მათი რისკის მართვის პრაქტიკის განმტკიცების მიზნით.