BMW ჯგუფის რეგიონული მენეჯერის მოადგილე ვიქტორ აიზენბრაუნის თქმით, BMW ჯგუფი" MINI-ს ოფიციალურ რეალიზაციას მსოფლიოს 90 ქვეყანაში ახდენს, დღეიდან კი ეს საქართველოშიც განხორციელდება.

"საქართველო სამხრეთ კავკასიაში პირველი ქვეყანაა, სადაც ზემოხსენებული ბრენდი BMW ჯგუფის ნებართვით "ომეგა მოტორსის" მიერ გაიყიდება", - აღნიშნა მან.

"ომეგა მოტორსის" ტექნიკური მენეჯერის აკაკი ენუქიძის განცხადებით კი, ამჟამად "ომეგა მოტორსს" MINI ჰეტჩბეკის, კუპეს, ქანთრიმენის (4-კარიანი) და კლაბმენის რეალიზაცია შეუძლია. MINI როადსტარი ჯერ არ გამოსულა, ხოლო MINI კაბრიოს "ომეგა მოტორსი" საქართველოში უახლოეს მომავალში შემოიყვანს.

ენუქიძის თქმით, "ომეგა მოტორსი" მომხმარებელებს 2-წლიან გარანტიას და უამრავ სერვისს სთავაზობს, რომლითაც მათ MINI-ს საკუთარ გემოვნებაზე მოწყობა (როგორც დიზიანის ისე ტექნიკური თვალსაზრისით) და შეძენა შეუძლიათ. ბანკების მეშვეობით შესაძლებელია MINI-ს განვადებით შესყიდვაც.

"ომეგა მოტორსის" ტექნიკური მენეჯერის განცხადებით, MINI-ს საქართველოში შემოყვანის გადაწყვეტილება მომხმარებლის მოთხოვნას უკავშირდება. ამ დროისთვის საქართველოში MINI-ს მხოლოდ ასამდე მანქანა მოძრაობს.

"ომეგა მოტორსის" დირექტორის ლელი აბულაძის ინფორმაციით კი, "ომეგა მოტორსი" ფილიალის ბათუმში გახსნასაც გეგმავს და MINI-ს საპრეზენტაციო ჩვვნება თბილისის შემდეგ ბათუმშიც გაიმართება.

პრესკონფერენციის შემდეგ, "ომეგა მოტორსში" გრანდიოზული შოუ-ჩვენება გაიმართა, რომელიც ცნობილ მსახიობს, ნანკა კალატოზიშვილს მიჰყავდა.

"ომეგა მოტორსში" შეკრებილმა მედიის წარმომადგენლებმა, ბიზნესმენებმა და საზოგადოებისთვის ცნობილმა ადამიანებმა დაათვალიერეს MINI-ს მსოფლიოში სახელგანთქმული სხვადასხვა მოდელები (ქანთრიმენი, კუპე, კლაბმენი, ჰეტჩბეკი), გაეცნენ მათ თავისებურებებსა და ღირსებებს.

ცნობისთვის, BMW ჯგუფმა MINI-ს წარმოება ქალაქ ოქსფორდში 2001 წლიდან დაიწყო. იმ დროისთვის აწარმოეს 2 მილიონზე მეტი მანქანა, რომელიც ექსპორტზე 90 სხვადასხვა ქვეყანაში გავიდა.
MINI-ს როგორც ახალი, წარმატებული ბრენდის არსებობა სწორედ 2001 წლიდან დაიწყო.
2011 წლის ივნისში BMW ჯგუფმა გამოყო დამატებით 500 მილიონი ფუნტი დიდ ბრიტანეთში საწარმოო ქსელისთვის და გადაწყვიტა, რომ მომდევნო სამი წლის მანძილზე ბრენდის შემდგომი მოდელების წარმოებას ბრიტანეთი დაიწყებს.