მოწმობა, რომელზედაც პირის სახელი, გვარი და პირადი ნომერია დატანებული, მისი იდენტიფიცირებისთვის საკმარისი გახდება. აღნიშნულთან დაკავშირებით ცვლილება შედის "საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ" კანინში.
როგორც იურიდიულ კომიტეტის სხდომაზე კანონპროექტის ერთ-ერთმა ინიციატორმა კახაბერ ანჯაფარიძემ განმარტა, ცვლილებების განხორცილების შემდეგ პირს საშუალება მიეცემა პირადობის მოწმების ნაცვლად ბანკში მომსახურების მისაღებად მართვის მოწმობა გამოიყენოს.
"მოწმობა, რომელზედაც არის დატანებული სახელი, გვარი და პირადი ნომერი, გაუგებარია, რატომ არ შეიძლება გამოიყენებოდეს პირის იდენტიფიცირებისთვის. ამასთან, მინდა ლევან ვეფხვაძის გასაგებად ვთქვა, რომ ეს ცვლილებები არჩევნებთან კავშირში არ არის", - განაცხადა ანჯაფარიძემ.
კანონპროექტის თანახმად, დგინდება, რომ კანონმდებლობით გათვალისწინებული დოკუმენტი, რომელშიც მითითებულია საქართველოს მოქალაქის ან საქართველოში მცხოვრები უცხოელის, სახელი, გვარი და პირადი ნომერი, შეიძლება გამოყენებული იქნას პირის იდენტიფიცირებისთვის, როგორც ამ პირის პირადობის დამადასტურებელი დოკუმენტი, თუ პირადობის დადასტურებისთვის აუცილებელი ინფორმაცია კანონით დადგენილი წესით გადამოწმებული იქნება სააგენტოს ელექტრონულ ბაზაში.
