საკონდიტრო ხელოვნების მსოფლიო ჩემპიონატში "Mondial des Arts Sucres" "გუდვილის" კონდიტერები მიიღებენ მონაწილეობას. "გუდვილის" ინფორმაციით, მსოფლიო ჩემპიონატი პარიზში 3-6 მარტს გაიმართება.
როგორც კომპანიაში განმარტავენ, პირველი გამარჯვება "გუდვილის" კონდიტერებმა უკვე მოიპოვეს. 135 მონაწილე გუნდიდან "გუდვილის" კონდიტერები 20 საუკეთესო ქვეყანას შორის მოხვდნენ. ფინალურ ასპარეზობაზე საქართველოდან 5-კაციანი ჯგუფი მიემგზავრება.
ჩემპიონატს 3 ძირითადი მოთხოვნა აქვს: 1. კონდიტერებმა უნდა შექმნან სკულპტურები, რომელიც შოკოლადით, კარამელით და შაქრის ფხვნილისგან მიღებული პასტიაჟით იქნება შესრულებული. დიდი მნიშვნელობა შესრულების ხარისხთან ერთად შინაარსობრივ დატვირთვასაც ენიჭება. სკულპტურები უნდა იყოს კრეატიული და მაღალტექნოლოგიურ დონეზე შესრულებული; 2. კონდიტერებს ევალებათ ტრუფელების და პტიფურების (მინინამცხვრები, რომლის წონა 30გრ-ია) შექმნა; 3. კონდიტერები შეფასდებიან დესერტებისა და ნამცხვრების მომზადებაში.
"მსოფლიო ჩემპიონატი საკონდიტრო ხელოვნებაში უკვე მესამედ ტარდება და ყოველ წელს მასში 20-მდე ქვეყანა მონაწილეობს, თუმცა საქართველო ამ ჩემპიონატს მხოლოდ წელს უერთდება. მოხარული ვართ, რომ სწორედ "გუდვილის" კონდიტერები წარადგენენ ჩვენს ქვეყანას ამ უმნიშვნელოვანეს ასპარეზზე. ეს არის ძალიან ამბიციური და საპასუხისმგებლო განაცხადი, საქართველოს საკონდიტრო ხელოვნებას პირველად გუდვილის კონდიტერები გააცნობენ მსოფლიოს. ჩვენი კონდიტერები არაერთი ფესტივალის პრიზიორები არიან, მათი პროფესიონალიზმი მხოლოდ დადებითი შედეგის გარანტია. კონკურში მონაწილეობის მხარდაჭერისთვის კი დიდ მადლობას ვუხდით კომპანია ბადაგონს", - განაცხადა "გუდვილის" წარმოების ხელმძღვანელმა ლია კანდელაკმა.
ჩემპიონატისთვის მოსამზადებელ ეტაპზე გუდვილს ფრანგი მსოფლიო ჩემპიონი საკონდიტრო ხელოვნებაში, პატრიკ კაზულა დაეხმარა. ხელოვანმა 10-დღიანი მასტერკლასი ჩაუტარა "გუდვილის" კონდიტერებს და გააცნო ის ძირითადი მოთხოვნები, შესრულების ტექნიკა და პრინციპები, რომელსაც ჩემპიონატის ორგანიზატორები ითხოვენ. შეირჩა საგამოცდო სკულპტურის თემა, გაკეთდა სატესტო ნიმუშები, შეფასდა მომზადების დონე და შესრულების ხარისხი.
32 კაცისგან შემდგარი ჟიური შეაფასებს კონდიტერთა როგორც პროფესიულ, ასევე გუნდურ მუშაობას, ნამუშევრების გემოს და მათ ვიზუალურ მხარეს.
"გუდვილის კონდიტერები წლებია, გამარჯვებულები და დიპლომირებულები ბრუნდებიან სხვადასხვა ფესტივალიდან თუ კონკურსიდან. დარწმუნებული ვარ, ამჯერადაც წარმატებით გაართმევენ თავს იმ საპასუხისმგებლო მისიას, რომელიც მათ აკისრიათ როგორც კომპანიის, ასევე ქვეყნის წინაშე",- განაცხადა "გუდვილის" გენერალურმა დირექტორმა მიხეილ ჩარკვიანმა.
