სწრაფი ფულადი გზავნილების ბაზარზე, რომლის მოცულობაც 1,368 მლრდ. აშშ დოლარია, 20-ზე მეტი საფინანსო სისტემა მოქმედებს. მათი უმრავლესობა ბანკებში და მიკროსაფინანსო ორგანიზაციებშია ინტეგრირებული. კვლევის შედეგებს ეკონომიკური კვლევებისა და კონსულტაციების ცენტრი აქვეყნებს.
2011 წელს ფულადი გზავნილების მთლიან ბრუნვაში ბაზრის ლიდერია მსოფლიო ბრენდი Western Union - 16,15%-ით, თუმცა მისი წილი ბოლო წლებში იკლებს. ბოლო ერთ წელიწადში კომპანიამ ქართული ბაზრის 5% დაკარგა.
აღსანიშნავია Intel Express-ი, რომელიც ბაზარზე დამოუკიდებლადაც მუშაობს, აქვს ქსელი თბილისში და რეგიონებში, გამორჩეულია დაბალი საკომისიო ტარიფებით. გარდა გზავნილებისა, ემსახურება ამანათებს და ეწვევა სალომბარდო მომსახურებას.
ბაზარზე ფიქსირდება მცირე კომპანიების საბაზრო წილის შემცირების ტენდენცია, მკვეთრი ზრდა დაფიქსირდა Unistream-ის და Zolotaia Korona-ს შემთხვევაში, ორივე შემთხვევაში ზრდამ 5% შეადგინა. Intel Express-ის მდგომარეობა ბაზარზე სტაბილურია.
ჩარიცხვების სეგმენტში 2010 წელთან შედარებით ბაზარზე ლიდერებში მნიშვნელოვანი ცვლილებები დაფიქსირდა. პირველ პოზიციაზე 2011 წლის მონაცემებით არის Unistream-ი, რომელმაც საბაზრო წილი 5%-ით გაზარდა და ლიდერი Western Union-ი ჩაანაცვლა, რომლის წილი ბაზარზე 5%-ით შემცირდა და მესამე პოზიციაზეა.
მეორეზე შარშანდელის მსგავსად Intel Express-ია, რომელიც 15%-იან საბაზრო წილს სტაბილურად ინარჩუნებს. აღსანიშნავია Zolotaia Korona-ს წილის გაზრდა 5%-ით და ჩარიცხვების ნაწილში ბრუნვის 2-ჯერ მეტი ზრდა.
სხვა სისტემების საბაზრო წილები შემცირდა, თუმცა ჩარიცხვების მოცულობა ყველას გაზრდილი აქვს. გამონაკლისი მხოლოდ Western Union-ია. ჩარიცხვების მოცულობა 2011 წელს 21%-ით გაიზარდა.
გადარიცხვების სეგმენტში ბაზარზე ლიდერი Western Union-ია, მიუხედავად იმისა, რომ მისი საბაზრო წილი 1%-ით შემცირდა. მეორე პოზიციაზე არის Intel Express-ი, მისი წილი გასულ წელთან შედარებით 7%-ით არის შემცირებული. მესამე მოხვდა Privat Money, რომელიც ძირითადად უკრაინაში გადარიცხვებს ემსახურება, მისი წილი ბაზარზე 5%-ით არის გაზრდილი. ჩარიცხვების სეგმეტის ლიდერი Unistream-ი გადარიცხვებში მეექვსეა, მისი საბაზრო წილი 2%-ით გაიზარდა.
სხვა სისიტემების წილები ბაზარზე უმნიშვნელოდ შეიცვალა. Zolotaia Korona გასულ წელს გადარიცხვების სეგმენტში საერთოდ არ ოპერირებდა, 2011 წელს მისი წილი 2,3%-ია. გადარიცხვების მოცულობა 2011 წელს 3%-ით შემცირდა.